“Nganong wa na lang nila dakpa para kung tinuod man, mag-antus sila sa prisohan.”
MATAG sayo sa buntag, alegre kaayo mi nga maghisgutanay sud sa compound sa akong gipuy-an dinhi sa siyudad sa Davao.
Sukad pa kaniadto sa kampanya, paboritong topiko sa among mga kaubanan ang politika, ilabi na ang mga kampanya nga gipatuman sa administrasyon ni Pangulong Rodrigo Duterte.
Dunay maglalis tungod kay masakitan kung dunay mokuwestiyon sa pamaagi sa gobyerno. Gani, dunay magsininggitay, ug duna say di na magtingganay kay lagi nahiubos kay nalupig sa katarungan.
Usahay magkinataw-anay ug magkinantiyaway kay dunay miapil nga kusog kaayong manghinaway.
Halos kada adlaw gyud ni nga mahitabo sa amo, nga moabot sa punto nga alingugngog na kaayo nga paminawon.
Apan tungod kay mga amigo man lagi, hala, apil na lang sab ko sa pagkatawa ug pagngisi.
Sa among kulukabildo, dunay among amigo nga grabe kaayong makadepensa sa kapulisan, ilabi na kung dunay matumba nga durugista kay alang niya, mirisi nila kay daghang kinabuhi nga nabiktima.
Apan nausab ang templada niya dihang nabalitaan nga napatay si Ozamis City Mayor Reynaldo Parojinog Sr. ug lain pang 14 ka mga tawo.
Matud pa niya, “Grabe na sab kaayo ang ilang gihimo.” Tubag nako niya, “Unsay imong gipasabot, bay?” Ug mitubag sab siya, “Ang pulis ba, bay.” Mitubag sab ko niya, “Naunsa man diay ang pulis?” Midayon sab siya pag-ingon, “Nganong wa na lang nila dakpa para kung tinuod man, mag-antus sila sa prisohan.”
Ug sa akong pagsukit-sukit niya, didto nako nasayran nga nasakitan diay siya sa nahitabo ni Mayor Parojinog nga ig-agaw niya.
Ug matud pa niya, nahurot na iyang bilib sa mga pulis nga maoy tigpatuman sa kampanya kontra druga.
Tungod sa nahitabo, daw mipabor siya sa mga senador ug kongresista nga nagkuwestiyon sa operasyon sa kapulisan, kay nagtuo sila nga dunay angay natong masayran.
Alang sab sa uban nga di paryente sa mga namatay, nakadayeg sila sa kapulisan ug alang nila, di na angay pang imbestigahan sila.
Gawas niini, ang mga tawo nga mokuwestiyon sa gihimo sa kapulisan, alang nila, kaabin sa mga dautan ilabi na sa mga durugista nga giampo nilang maoy sunod mabugha.
Sa mga nagkuwestiyon sa kapulisan, kung nagtuo mo nga tinuyo ang nahitabo, ayaw lang kabalaka kay moabot ra gihapon ang panahon nga mahugno ang bakak sa iyang kaugalingon nga gibug-aton.