GIPANIGURO sa lokal nga kagamhanan sa Davao City nga wala nay magsweldo nga moubos sa P10,000 matag bulan sa mga empleyado sa City Hall sa mosunod nga tuig.
Kini ang gibutyag ni Davao City Mayor Sara Duterte-Carpio human niya napasa ang budget proposal sa Sangguniang Panlungsod.
Sa nasampit nga proposal, nalakip ang P10,000 nga minimum nga sweldo sa mga naka-kontrata, job order ug contract of services sa City Hall.
Apan gipasabot sa mayor nga walay labot niini ang mga volunteers sama sa Bantay Dagat, Bantay Bukid ug uban pa apan maningkamot siya nga madugangan sab ang ilang suholan.
Nagtuklod sa mayor sa plano mao ang nagdasok nga mga job orders ug mga contract of services nga anaa sa City Transport and Traffic Management Office, sa City Environment and Natural Resources Office, Public Safety and Security Command Center ug Central 911, diin 24hrs/day ug anaa sa dalan ang trabaho sa mga nahisgutan.
Kini ang nahimong hinungdan nganong nag-recompute sila sa budget ug nadesisyonan nga himuong P10,000 ang kasamtangang P7,300/month nga commission rate sa mga empleyado. (Richy F. Nalagon uban sa dXDC RMN Davao)