SA labing unang higayon, usa ka Inter-Agency Enforcement Plan ang himuon aron panghingusgan pa ang pagpatuman sa balaod sa kadagatan sa Tañon Strait ug Visayan Sea.
Gihulagway nga usa sa labing dako nga fishing ground sa nasod ang Tañon Strait Protected Landscape ug Visayan Sea hinungdan nga ang international advocacy group nga Oceana Philippines, nihiusa sa mga ahensiya sa gobyerno aron mapatuman ang balaod ingon man malikayan ang ilegal nga pagpangisda.
Karong adlawa, magtagbo ang opisyal sa Philippine Navy, Oceana Philippines, Bureau of Fisheries and Aquatic Resources (BFAR) 7, Armed Forces of the Philippines, ug uban pa aron pagahisgutan ang enfocement plan.
Matod sa campaign manager sa Oceana PH nga si Candeze Mongaya nga karong adlawa, Disyembre 12, sa dakbayan sa Toledo, pagahisgutan usab ang importante nga papel sa Philippine Navy sa Fishery Law Enforcement.
Subay niini, anaa karon sa pantalan sa dakbayan sa Toledo ang BRP Tarlac, nga mao’y labing dako nga barko alang sa law enforcement sa nasod.
Ang BRP Tarlac nga usa ka lead ship usa ka landing platform dock (LPD) sa Philippine Navy diin anaa kini’y kapasidad nga 500 ka tropa ug gipaspason nga 16 knots.
Tungod kay giabusaran ang pagpangisda sa Tañon ug sa Visayan Sea, mas panghingusgan pa sa nagkadaiyang ahensiya ang pagpatuman sa balaod sa bahin sa dagat nga naa sa tunga-tunga sa Sugbo ug Negros ingon man ang pagdakop sa mga molapas sa balaod.
Lakip sa enforcement plan kining patrol points, intelligence gathering ug reporting ug uban pa.
Motambong sa maong dialogue sila si Commodore Loumer Bernabe, AFP, Commander Naval Forces Central; Dr. Nilo Katada, regional director sa BFAR 7; Atty. Rhea Yray, Cebu Anti-Illegal Fishing Task Force; ug si Mar Guidote, director for external and government relations sa Oceana PH. HBL