ISAKA sa Police Regional Office 7 (PRO) 7 ang ilang alert status gikan sa normal ngadto sa full alert atol sa unang adlaw sa Misa de Gallo sa Disyembre 16 sa kaadlawon diin tanang mga simbahan nga adunay relehiyosong kalihukan butangan og pulis alang sa siguridad sa mga debotong Katoliko.
Way nadawat nga hulga ang PRO 7 pinaagi sa report sa National Intelligence Coordinating Agency NICA 7 atol sa mga kalihukan sa “simbang gabi.”
Matod ni PRO 7 Director Chief Supt. Debold Sinas nga sa maong adlaw, ilang isaka ang alert status sa kapulisan sa Central Visayas gikan sa normal ngadto na sa full alert.
Kini nagpasabot nga ang tanang personnel sa PNP lukop rehiyon alerto sa kanunay ug kinahanglan nga ang mga simbahan nga adunay mga kalihukan pabutangan og mga pulis.
Ang Misa de Gallo maoy dry run sa PNP sa ilang pagpangandam sa paghatag sa siguridad sa Sinulog sa sunod nga tuig.
Kon kaniadto giplanohan nila nga mopawong silag signal sa cellphone, karon di na kini buhaton sa PRO-7.
“Ay dili na ta magpawong sa signal kay sa Sinulog nalang na. The telcos will be on the sinulog only,” matod ni Sinas.
Sa unang adlaw sa Misa de Gallo, ang Cebu Metropolitan Cathedral patutokan ni Cebu City Police director Sr. Supt. Royina Garma sanglit usa ni sa labing dako nga simbahan diin diha usab magdasok ang mga tawo aron manimba.
Gihulagway ni Garma nga ang tanang 1,200 ka personnel sa CCPO iyang ipakatap sa simbahan ala una pa lang sa kaadlawon sa di pa magsugod ang misa.
Matod niya nga mahimong alas 10 na sa buntag mo-report sa mga opesina ang mga pulis nga mo duty sa mga simbahan.
Miawhag siya sa mga barangay kapitan sa syudad sa Sugbo nga abagan sila sa pagbantay sa mga simbahan pinaagi sa pagpakatap usab sa ilang mga barangay tanod ug mga sakop sa BPATS.
Gipasabot ni Garma nga di lang Simbang Gabi ang ilang gibantayan lakip na ang kabalayan panahon sa kaadlawon aron di mabiktima sa akyat bahay.
“So, nanawagan ako sa mga barangay captains sana kung may simbahan sa area nyo, to activate your bpats or yung mga barangay tanods to help secure the area,” matod ni Garma.
Sama sa nanglabay nga Misa de Gallo adunay mga pulis sa karsada nga gi deploy ilabi na sa mga dapit nga ngitngit ang agianan. AYB