DEAR Noy Tikyo,
Ako diay si Maja, 25 anyos. Ang akong suliran bahin sa gugma.
Naglibog ko karon sa angay nakong buhaton kay duna koy friend nga babaye nga tawgon lang nato og Angel ug dunay friend nga lalaki. Ang lalaki, gipaila sab niya nako ug nagka-friend mi. Taguon lang nato sa ngalan nga Ben.
Samtang nagkadugay ang among friendship ni Ben, medyo milawom ang akong pagbati ngadto niya.
Apan nasayud ko nga nakagusto si Angel ngadto kang Ben. Pero wala lang siya magsaba kay duna siyay boyfriend.
Kaming tulo magsige og kita kay nia ra man mi magtrabaho sa Davao City ug pulos pa mga single.
Karon si Ben nag-text kay gusto siyang makig-istorya nako nga kami rang duha. Kay ingon niya, duna siyay itug-an diri nako.
Naglibog ko sa akong buhaton kay si Ben gusto sab nga makig-istorya kang Angel. Nagtuo ko nga basin og lumpongon mi niya.
Makig-istorya kaha ko niya o di na lang? Daghang salamat.
Maja
*****
Maja,
Mas nindot kon imo siyang istoryahon aron nga imong masayran kon unsay gusto niyang itug-an diha nimo. Kay hangtud nga di ka makig-istorya niya, kutob ra gyud ka sa pagduda nga posibleng manguyab siya nimo. Apan puwede sab nga dili.
Tingali panahon na kini aron nga imong matugkad kon duna pod ba siyay pagbati nimo kay milawom pod baya ang imong gibati para niya.
Pasagdi lang kon makig-istorya sa siya sa imong friend kay basin og lahi ang ilang panag-istoryahan ug di bahin sa gugma.
Ayaw lang og unahi ang mahitabo kay basin unya og makondisyon ang imong hunahuna unya ma-frustrated ka na hinuon kay di maoy iyang tuyo nimo.
Sa pagkakaron, paundayoni lang una si Ben sa buot niyang mahitabo kay wa may dautan sa iyang imbitasyon. Kay kon unsa man gani kini. Ang importante lang nga di ka magdali-dali sa pagdesisyon ug hatagi ang imong kaugalingon nga makahunahuna og maayo.
Sayo pa sab nga ihatag nimo ang tibuok mong pagsalig ngadto ni Ben kay bag-o pa man mo magkaila.
Noy Tikyo
(Ipadala ang inyong suwat-suliran sa noytikyo@yahoo.com)