ATONG ipadayon ang paghisgot kalabot sa pagwala sa Pilipino nga subject sa kolehiyo nga giduso sa Commission on Higher Education (Ched).
Basin nagdahom mo nga sayon lang ang pinulongan nga Tagalog tungod kay mga Pinoy man ta. Kon nakabantay mo sa atong una nga paghisgot ining suhetoha niadtong milabay nga semana, dakong sipyat ang ulohan tungod “Filipino” ang atong gigamit nga nagpunting man kana sa tawo kay Pilipino ang dapat.
Nahimuot ko pagpaminaw kang Pangulong Digong kay nakapamalikas siya samtang namulong kay wa siya kabalo unsa ang tinagalog sa ligid. Unsa pa kaha ang mga yanong katawhan nga wa maka-eskuwela sa kolehiyo?
Sa isla sa Mindanao sagol ang sinultihan tungod sa pag-anhi sa daghang tribu gikan sa Luzon ug Visayas apan mas magkasinabot ra sila kon maningkamot pagsulti og Tagalog. Lahi ang Tagalog sa Davao kay sagol Bisaya apan okay ra.
Hinuon usahay makalibog kay ang langgam sa Tagalog, amigas man sa Bisaya, mao nga sa ila ang langgam naglupad na samtang sa Bisaya nagkamang pa.
Gikuwestiyon sa Alyansa ng mga Tagapagtanggol ng Wikang Pilipino ang lakang sa Ched tungod sa paglapas sa Education Act of 1982 ug ang Organic Act of the National Commission for Culture and the Arts.
Atong idugang paghisgot ang mga sayop nga kasagaran atong madungog sa mga magsusulti sa paggamit sa mga pulong nga dili haum sa pinulongang Bisaya.
Sayod ba mo ug nakadungog nga daghan ang nasayop sa paggamit sa pulong “Adto ug Anhi”? Sayop ang pag-ingon nga miadto ko dinhi kay ang adto angay gamiton sa dapit nga wala nahimutangan sa nagasulti.
Ang husto mianhi ko dinhi. Ex. Adto dinhi. Dapat “ari o anhi.” Laing pulong nga “Sama ug Susama.” Kon ang butang ginahisgutan tukma o parehas, insakto, ang gamiton “sama” apan kon dili piho, insakto ug pareha, ang dapat gamiton “susama”. Example. Mga magsisibya nga nagprograma insakto alas siyete sa buntag apan manamilit nga mag-ingon “mag-uban ta ugma sa susamang panahon”. Nganong susama man nga sa natakdang oras man ka makig-uban? Kon dili ka sure nga naa ka sa maong programa anang orasa husto ang paggamit sa susama.
Daghan ta'g sayop nga dili nato mabantayan apan mamatikdan sa uban. Maoy hinungdan nga ang lapis gibutangan og eraser, ang keyboard sa computer unay “delete” aron papaon ang atong mga sayop.
Daghan pa unta ta'g angay hisgutan apan nahutdan na ta'g espasyo busa hangtud sa sunod na sab.