Editoryal: Paglugway sa martial law

PADAYON nga gibarugan sa pipila ka mga magbabalaod nga way basehan aron nga lugwayan ang martial law sa Mindanao.

Kini taliwala sa makabungog nga boto sa 235 nilang mga kaubanan sa duha ka balay balauranan sa Kongreso aron paboran ang paglugway sa hangyo ni Pangulong Rodrigo Duterte ug ang pagsuspende sa privilege of habeas corpus sa makatulo ka higayon hangtud sa Disyembre 31, 2019.

Baynte otso lang ang mibabag samtang usa ang ni-abstain.

Matud ni Albay Rep. Edcel Lagman nga di na kini angay nga lugwayan kay gi-liberate na ni Duterte ang Marawi City, nga maoy ugat aron nga ideklara ang martial law sa isla.

Gipahimug-atan sab ni Bayan Muna partylist Rep. Carlos Zarate nga human na ang giyera sa Marawi busa wa nay angayan pang ipatuman nga balaod militar.

Samang baruganan sab ang gipasibaw sa mga senador nga sila si Franklin Drilon, Kiko Pangilinan ug Chiz Escudero.

Apan tataw sa pahayag ni Executive Secretary Salvador Medialdea nga kinahanglan pa gihapon ang martial law ug suspension of the privilege of the writ of habeas corpus tungod sa hulga sa mga terorista sa isla.

Matud sab sa bag-ong gipahimutang nga Armed Forces of the Philippines Chief of Staff Lt. General Benjamin Madrigal Jr. nga naa pa sa kapin kun kulang 2,400 kaaway sa gobyerno karon sa Mindanao apil na ang Abu Sayyaf Group, Bangsamoro Islamic Freedom Fighter, DaulhMlah Islamia ug ang komunista.

Nagpasabot nga di lang ang Maute Group sa Marawi City ang gitutokan sa kagamhanan, kon di ang uban pang mga armadong grupo nga nakigbatok sa gobyerno.

Angay masayran sa mga misupak nga magbabalaod nga di lang Marawi City ang nahisakop sa isla sa Mindanao, apan duna pay daghang mga lugar kon diin uban niini kritikal gumikan sa kalihukan sa terorista ug komunista.

Alang sa mga taga Mindanao, dako og natabang ang martial law sa inadlaw-adlaw nga pamuyo gumikan sa pagkasikop sa daghang mga rebelde ug pagtahan sa daghang mga loose firearms, pagneyuralisa sa mga pagpamomba ug pagpanghasi sa mga rebeldeng New People's Army.

Puriso di ikatingala nga ang taga Mindanao nisuporta nga lugwayan ang martial law aron magpabilin ang kalinaw ug kahapsay sa isla.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph