NAHIMONG mabungahon ang kampanya sa Philippine Drug Enforcement Agency (PDEA)-Davao Region alang karong tuiga.
Atol sa AFP-PNP press conference sa The Royal Mandaya Hotel, gibutyag ni PDEA-Davao director retired Senior Supt. Antonio Rivera ang ilang mga malampusong nahimo.
Una na niini ang 1,058 ka operasyon alang karong tuig, kumpara sa 693 niadtong 2017 ug dunay 1,422 nga naaresto karong tuiga ug 46 ka mga drug suspects ang napatay sa operasyon.
Dunay 38 usab ka mga menor de edad ang na-rescue karong tuiga kumpara sa 22 lamang niadtong milabay'ng tuig.
Gipasabot ni Rivera nga midaghan ang mga na-rescue nga menor de edad kay sila ang ginagamit sa mga durugista nga tigdala sa ilegal nga druga.
“Wala man god criminal liability ang mga menors, so sila ang ginagamit sa sa mga sindikato sa druga,” sulti ni Rivera.
Midaghan sab ang mga high-value targets (HVTs) nga nadakpan sa ahensya karong tuiga, miabot kini sa 16, upat ang elected officials, tulo ang sakop sa kapulisan ug kasundaluhan ug siyam mga empleyado sa gobyerno kumpara sa milabay nga tuig nga pito lamang nga gilangkuban sa sakop sa kapulisan ug kasundaluhan.
Gipasalig sa PDEA-Davao nga padayon ang ilang kampanya batok sa ilegal nga druga sa Davao Region. (Richy F. Nalagon)