DEAD on the spot si Eduardo Secondes, suspek sa pag-molestiya sa 5-anyos nga bata human kini nangilog og pusil sa iskort niini nga babaye’ng pulis sa pagpa-ilawom kaniya sa Automated Fingerprint Identification System sud sa San Pedro Police Station sa Davao City kagahapon sa buntag.
Sumala ni Chief Inspector Benkalin Baluan, hepe sa San Pedro PNP, nga dihang padayon ang pag-fingerprint sa suspek kalit kining nangilog og pusil hinungdan nga giniyutralisa kini, apan nakabsan sa kinabuhi.
“Nag-fingerprint ta niya [suspek], mikalit lang kini og ilog sa pusil sa usa nato ka pulis nga nag-escort niya, now, since procedure nato, gi-neutralize ang suspek but unfortunately nakabsan siya,” ingon ni PCI Baluan sa pakighinabi sa mga tigbalita, kagahapon.
Dugang ni Baluan, “nagsalig seguro ang suspek nga babaye ang guwardiya niya.”
Sa pakighinabi sa SuperBalita sa mga kaubanan nga priso, naguol pag-ayo ang suspek sa iyang gidangatan dihang nahuwasan na siya sa iyang kahubog.
“Pagkabuntag, pagmata niya, makita namo nga nagmahay siya sa iyang gihimo kay nahuwasan naman siya sa iyang kahubog, ug nagguol sab siya kay kabalo na gyud siya sa iyang dangatan, mao seguro nga miuna siya'g pangilog og pusil,” ingon sa usa ka priso.
Una niini, positibo nga namolestiya sa suspek, 41, ang 5-anyos, alas 7 sa gabii niadtong Lunes sa Barangay 76-A, Bucana, Davao City.
Sa impormasyon, natingala ang mga ginikanan sa bata nga wa kini sa ilang balay nga hapit na alas 8 sa gabii.
Dihang gisubay na sa iyang pamilya ang biktima, naaktuhan sa uyoan niini nga gimolestiya na kini sa suspek didto sa usa ka giabandona nga balay.
Tungod sa hitabo, gitabangan og kulata ang suspek sa mga kabanay ug gilayong gipadakop sa mga pulis.
Kahinumdoman, ikatulo na si Secondes nga napatay sa kapulisan human giingong nanukol sa otoridad samtang sila giproseso sa pagpasaka og kaso.
Hunyo 23, ning tuiga, napatay sab sa Talomo Police Station si James Barrete Narte, 35, usa ka laborer kinsa maoy suspek sa paglugos ug iyang gipatay ang usa ka 16-anyos sa Barangay Bago Gallera.
Napatay sab gumikan misukol sa operatiba sa samang istasyon ang usa ka Rico Jay Lauron Labao, 27-anyos kinsa giingong brutal nga mipatay sa 6-anyos sa Kilometer 9, Purok 11-A, Matina Pangi, ning siyudad.
Sa samang pakighinabi niadto sa mga kaubanan nga piniriso nila Labao ug Narte sila, nagbutyag nga mamilin-bilin na og istorya ang mga suspek ngadto kanila gumikan giingong kabalo na sila sa ilang dangatan.
Sa mga follow up nga mga istorya sa duha nga naunang napatay, nasaysay sa kabanay nila Narte ug Labao nga kung tinuod man ang ilang pagsukol, niyutralisa unta nga di mapatay aron makaserbisyo kini sud sa prisohan sa salaud nga ilang nahimo.
Depensa sa Davao City Police Office nga wala sila'y mahimo kun di ang pag-niyutralisa sa suspek kung mabutang na sa alanganin ang kinabuhi sa kapulisan.