SA daghang mga kawani ug opisyales sa gobyerno nga nakonbikto sa kaso nga graft and corruption, nagpabilin ang pangutana kon nauli ba ang kuwarta nga nakawat gikan sa panudlanan sa kagamhanan.
Si kanhi senador Sen. Ramon “Bong” Revilla Jr. giabsuwelto sa Sandiganbayan Special First Division sa boto nga 3-2 sa kasong plunder apan pabayron sa P124.5 milyones nga kickback gikan sa iyang pork barrel.
Apan gikonbikto sa Sandiganbayan ang mga kaubang akusado ni Revilla, ang giingong utok sa P10 bilyones nga pork barrel scam nga si Janet Lim-Napoles ug ang kanhi aide ni Revilla nga si manlalaban Richard Cambe.
Daghan ang naglibog nganong pabayron man si Revilla nga naabsuwelto man kaha siya sa kasong plunder. Nganong sila mang tulo ka mga akusado – si Revilla, Napoles ug Cambe ang pabayron? Unsa man ang gibasihan niini?
Ang Art. 100, Revised Penal Code, nagkanayon, “Civil liability of a person guilty of felony. — Every person criminally liable for a felony is also civilly liable.” Ang giingon dinhi mao nga kadtong tawo nga sad-an sa usa ka krimen adunay tulubagong sibil.
Si manlalaban Abdiel Fajardo, pangulo sa Integrated Bar of the Philippines (IBP), niingon, “The civil liability was only a consequence of the finding that a specific amount was illegally collected from government. At least that much was lost from government coffers as established in evidence.”
Samtang ang abogado ni Revilla, si Ramon Esguerra, usa ka kanhi undersecretary sa Department of Justice, nisupak sa desiyon sa Sandiganbayan. Matod pa niya, sanglit si Revilla way criminal liability, wa usab siyay civil liability.
Bisan si Fajardo naglibog nganong sila ra si Napoles ug Cambe ang gikonbikto sa mayoriya sa Sandiganbayan Special Firtst Division apan silang tulo lakip ni Revilla ang paulion sa P124.5 milyones nga kickback.
Mao kini ang kantidad nga nadawat ni Cambe nga iya untang ihatag ngadto ni Revilla apan ang prosecution napakyas sa pagprobar nga nadawat kini ni Revilla, hinungdan nga mitumaw ang usa ka “reasonable doubt” nga sad-an siya, busa naabsuwelto siya.
Si Sandiganbayan Associate Justice Geraldine Faith Econg, usa ka Sugbuanong mahistrado nga maoy nagsuwat sa desisyon sa mayoriya, niingon nga di popular ang maong desisyon.
“Yes, I know it’s unpopular. I would have loved to be a heroine, that I convicted him.But at the end of the day, I’m bound to rule based on evidence presented by both the prosecution and the defense,” matod pa niya. (edbarrita@gmail.com)