ANG kapulisan mihimo karon og nagkalain-laing gimik ning panahon sa pasko aron napadoul sila sa katawhan. Kini aron pag-counter sa kapulisan sa ilang bating imahin ngadto sa katawhan. Gusto sa kapulisan nga magpabilin ang pagsalig sa katawhan ngadto kanila. Nagplano na god ang Police Regional Office (PRO 7) nga mosalmot sa nagkalain-lain kalihukan sa Sinulog 2019. Halos tanang kalihukan ang ilang salmutan apil na siguro ang grand parade diin si PRO 7 chief Debold Sinas ang ilang star dancer.
Ang Lapu-Lapu City Police Office nanaygon sa mga lomolopyo sa hilit-hilit nga lugar labi pa kadtong naghitak ang illegal nga drugas ug daghang krimen ang nahitabo. Sa ilang pagpanaygon sa mga lomolopyo, inay nga sila maoy hatagan, sila maoy manghatag og christmas gifts sa ilang gidaygonan. Daghan tuod ang nalipay sa gihimo sa kapulisan sa Lapu-Lapu City.
Sa dakbayan sa Sugbo, ang Cebu City Police Office nga gipanguluhan ni City Director Royina Garma mihimo usab og nilahi nga gimik. Mangita sila og usa ka bata nga libud-suroy ug ilang ipasuroy, ilisan, pakan-on, i-shopping ug padad-an pa og pagkaon para i-share sa pamilya. .
Laing gimik nga gihimo sa CCPO, mao ang pagpahigayon og checkpoint sa kadalanan. Ilang parahon ang mga jeepney drivers, pangayuan og registration ug driver’s license unya diay ilang hatagan og christmas gift ug ang pipila ka mga pasahero. Si Garma uban sa mga members sa Police Advisory Council maoy nangulo sa maong kalihukan.
Pero ang Talisay City Police ug Mandaue City Police Office wala pa makahimo og susamang gimik. Kusog pa man ang patay batok sa mga durugista sa maong mga dakbayan. Ang ilang gihimo mao man ang sub-sub nga kampaniya batok sa illegal nga drugas. Inay regalo ang ihatag sa katawhan, bala man hinoon maoy mosugat sa mga durugista. Mo-ingon ang mga pulis ngadto sa mga durugista; ‘Merry Christmas’ bang, bang’. Aw, kon ang mga durugista dili gyud mohinong sa ilang kaboang, dili gyud kaabtan og pasko. #Pataypa more. (bobbygnalzaro@gmail.com)