NAKADAWAT og mga positibong reaksyon ang programa nga gitawag sa Cebu City Police Office og simultaneous Checkpoint of Joy (Carolling) ug One Time, Big Time sa kadalanan nga giabagan sa tanang sakop sa Cebu City Police Advisory Council nga gipangulohan ni Cebu City Councilor Joel Garganera.
Atol sa pagpahigayon, sila nanaygon ug nanghatag og mga regalo ngadto sa mga jeepney drivers sa 30 ka mga dapit sa siyudad sa Sugbo niadtong Lunes sa hapon, Disyembre 10.
Ang video sa pagpanaygon gi-upload ni Garganera sa iyang Facebook account nga nakaani og mga positibong komento gikan sa publiko.
Sa pagsuwat ning taho, aduna na kini 659,180 views, 9,528 shares, 1,373 comments ug 13,000 likes.
“Sa stress sige og drive, pamik up og pasahero apilan sad ug traffic kaayo, nice move Konsehal Joel Garganera for giving light moments sa kadalanan”, “Good job mga sir”, “nice mga sir and ma’am police, kahilak man sad tag apil,” pipila lang sa mga positibong komento nga nadawat sa maong video.
Si Garganera nipasabot nganong ila kining gibuhat.
Miingon sab siya nga ang maong kalihokan usa sa mga paagi para mahaduol ang kapulisan sa katawhan.
“Ang nakabati man gud kay ang mga police in general, sometimes they are making a sweeping statements, di nalang unta nako dapat isulti, but when a mayor tries to rally against the police and try to picture them nga daotan, grabe kaayo na. And also trying to picture the city as criminal city, that’s bad for everything , it’s bad for tourism, it’s bad for the business, it’s bad for the image of the city and the people,” dugang ni Garganera.
Gi depensahan sab sa konsehal ang kapulisan sa mga bating pagtan-aw sa publiko.
“Para nako, ang mga police are just human beings. Tawo ra sad na sila, naa’y mga pamilya, bana ni sila, amahan ni sila nga if you try to demonize them, daghang mga minahal sa kinabuhi ang maapektohan. Asa man mo makakita og trabaho nga pag gawas nimo pagkabuntag wala na’y kasigurohan nga mabalik ka nga buhi,” matod ni Garganera.
Si Konsehal Garganera wala milimod nga adunay mga badlungon nga kapulisan apan siya miingon nga aduna na silay gihimong lakang aron limpyohan ang imahe sa PNP.
“I know naa’y daghan mga badlungon sad, but we’re doing our best to clean the image of the PNP.”