KAY gikinahanglan pa nga susihon sa ubang mga konsehal ang mga dokumento, gi-defer o wa una giaprubahan kagahapon ang hangyo ni Mandaue City Mayor Luigi Quisumbing nga mosud og kasabutan alang sa land swapping tali sa usa ka pribadong tawo.

Kini ang gitug-an ni Bise Mayor Carlo Fortuna human sa regular session sa Konseho sa Dakbayan sa Mandaue Miyerkules sa hapon, Disyembre 12.

Matod sa bise mayor nga gikinahanglan na gyud ang land swapping aron makabalhin na ang 288 ka mga pamilya nga benipisyaryo sa relocation site sa Barangay Casili.

Matod ni Fortuna nga atol sa ilang session kagahapon sa hapon, sagad sa oposisyon nga mga konsehal nakapangutana kon unsa na ka-develop ang kapin sa duha ka ektaryang luna nga iya ni Pio Castillo sa Barangay Casili.

Ang luna ni Castillo ug ang yuta sa gobyerno sa Brgy. Opao nga giabangan ni Castillo sud na sa pipila ka tuig ang ipaubos sa land swap.

Gipasabot sa City Assessor nga di fully ma-develop ang lugar kundi usab mahitabo ang land swapping.

Ang hangyo ni Quisumbing tukion pag-usab karon Lunes sa special session sa Konseho nga maoy magsilbeng katapusan.

Mao usab kini ang nahitabo sa P2.4 million nga annual budget sa sunod tuig, gi-defer kini human ilang nadungog ang pasabot sa pangu sa City Social Welfare Services, Jessie Perez, kalabot sa financial nga assistance nga posibleng maapektuhan kon ugaling dayunon nila sa paglaslas og P10 milyones alang sa financial assistance, laing P10 milyones alang sa honorarium sa mga job order employees ug P20 milyones nga alang sa donations.

Daan na gitug-an ni Fortuna nga sa donations, diha kuhaon ang alang sa ihatag nga increase sa financial assistance alang sa mga senior citizen sa sunod tuig, lakip na ang alang sa scholarship program sa mga opisyal sa Sangguniang Kabataan (SK).

Gitug-an nila ni Association of Barangay Councils (ABC) president Konsehal Ernie Manatad ug sa ubang konsehal nga anaa sa oposisyon nga ilang i-rekonsider ang paglaslas sa budget, human madungog ang pagpasabot ni Perez kagahapon sa Konseho.

Samtang alang usab ni Konsehal Jun Del Mar, iyang gipasabot nga trabaho lang usab nila sa Konseho ang pag-utingkay sa mga ipalabang ilabi na ang budget.

Samtang karong Lunes usab himuon ang final reading ug kon aprubahan ba ang tag P2,000 nga increase sa financial assistance sa dul-an 20,000 ka mga senior citizen sa Mandaue.

Kasamtangan nga P6,000 ang tinuig financial assistance alang sa senior citizens, apan mahimo kining P8,000 kon maaprobahan ang umentong P2,000.

Kagahapon igo lang una nga gi-adopt sa committe on laws ang pag-amendar sa maong ordinansahon.

Matod ni Fortuna nga ang tulo ang nag-una nga tukion karong Lunes, Disyembre 17.