ILLEGAL na sab?
Mao kini ang nagkadaiyang reaksyon sa publiko human gipublikar sa Miyerkules, Disyembre 12, ang desisyon sa Supreme Court nga mamahimo na usab nga manakop ang Department of Transportation (DOTr) ug Land Transportation Franchising and Regulatory Board (LTFRB) sa mga Angkas biker.
Ang desisyon sa Korte Suprema nga temporary restraining order (TRO) batok sa preliminary injunction sa Mandaluyong Regional Trial Court Branch 213 giluwatan niadtong Disyembre 5 pa.
Kahinumduman nga mi-isyu si Judge Carlos Venezuela sa Mandaluyong RTC og Writ of Preliminary Injunction niadtong Septiyembre ning tuiga sa Angkas aron makabalik kini og biyahe sa kadalanan.
Matod ni LTFRB 7 Regional Director Eduardo Montealto Jr., nga ipatuman nila kon unsa may desisyon sa Korte Suprema.
“We will wait for the directive for us (from Central Office),” matod ni Montealto sa Superbalita Cebu.
Gibutyag usab niya nga bisan kaniadto pa ilegal na kining Angkas o kining habal-habal.
Matag adlaw, aduna’y tulo ka mga aksidente ang matala sa Highway Patrol Group (HPG) sa Sugbo ug kasagaran niini nalambigit ang motorsiklo, mao kini ang iyang gibutyag.
Ang Land Transportation Office (LTO) ang moisyu og ticket sa panahon nga aduna’y madakpan nga Angkas biker nga giisip na karon nga kolurom.
Gawas niini, tungod kay aktibo na ang Inter-Agency Council for Traffic (I-ACT) sa Sugbo, magtinabangay ang HPG ug LTFRB sa pagpanakop niini.
Aduna’y P6,000 mga multa kon madakpan ang motorsiklo nga kolurom ubos sa Joint Administrative Order (JAO) 2014-001.
Tungod sa grabeng traffic sa Sugbo, usa ang Angkas nga gigamit sa mga riding public tungod kay dali kini nga makalusot-lusot.
Gawas sa Angkas, duna say liboan ka mga habalhabal drayber nga nanginabuhi sa kadalanan. Ang Angkas, sa ilang official statement, nasubo sa desisyon sa SC.
“This comes at a time when hundreds of thousands of commuters need the Angkas service to beat the worsening holiday traffic,” matod sa ilang pamahayag.
Gibutyag usab niya nga aduna’y 25,000 ka mga biker-partner ang mawagtangan og panginabuhi karon nga nagkaduol na ang Pasko.
“We are hopeful that the Supreme Court will eventually rule in favor of the Filipinos riding public.”