UNOM ka government-issued firearms ang gi-uli na sa mga opisyales sa Mandaue City ngadto sa Department of General Services (DGS), Miyerkules, December 12.

Ang DGS ang ulian sa maong mga armas og sila na ang mo-turn over niini ngadto sa Mandaue City Police Office (MCPO) aron maoy motago niini.

Niadtong Byernes, December 7, si Mandaue City Mayor Luigi Quisumbing nipagawas og memorandum ngadto sa mga City councilors, opisyal sa barangay, ug department offices head nga gipang- isyuhan sa 9mm ug 45 kalibre nga armas nga ipapa-uli kani.

Kini human na lakip ang dakbayan sa Mandaue sa Election Watchlist Areas (EWAS).

Gitug-an ni Engineer Marivic Cabigas, ang pangu sa DGS, nga niadtong December 12, gi-turn over nila ni Konsehal Nilo ‘Olin’ Seno, Konsehal Carmelino ‘Jun’ Del Mar, ABC Pres. Ernie Manatad ug sa tulo ka mga baranggay kapitan nga sila si Nelson Rubio, Asterio Suson ug Almario Bihag ang ilang mga armas didto sa DGS.

Matud ni Cabigas nga niadtong Marso kini gi-isyu kanila, human usab ang maong mga hingtungdan ang ni-request alang sa ilang seguridad. Ug niadtong Myerkules sa hapon ra usab hingpit na nga gi-turn over sa DGS ngadto sa MCPO ang maong mga armas.

Gipasabot ni Atty. Elaine Bathan ang chief of staff sa office of the mayor, nga usa kini sa nakita sa mayor nga paagi sa pagtabang sa kapulisan ug sa Comelec nga mas malikayan ang kagubot.

“Considering that there was a release by the Comelec that Mandaue City is part of the Election Watchlist and considering also sa mga previous revelations including the one that we have had in the last session (Nov. 21) where it can be seen that there are suspected narcopoliticians and drug lords plying the City, the mayor finds it prudent for everybody to turn over the issued firearms for the meantime nga we are still under EWAS,” gitug-an ni Atty. Elaine Bathan.

Gihangop kini ni MCPO director, Senior Supt. Julian Entoma ug nihulagway nga dakung tabang aron mapadali na usab ang ilang pag- awhag sa uban pa nga adunay armas sa di gyud pagdala-dala niini o pag-surrender sa mga loose firearms, ilabi na kon magsugod na unya ang election gun ban, sa Enero 13, 2019.