GIBUTYAG sa Criminal Investigation and Detection Group (CIDG)-Davao Region nga dunay 17 ka mga indibiduwal, naglakip sa duha ka mga mayor, nga ilang nadakpan atol sa pagpatuman sa Oplan Pagtugis o hugot nga kampanya batok sa mga pinangita nga mga tawo.
Si Milgrace Driz, pangulo sa CIDG-Davao, nagbutyag nga base sa ilang kalampusan sa siyudad, kadto lang Oktubre, nasignit nila ang pito ka mga indibiduwal ug niadtong Nobyembre, mga 10 ka mga pinangita nga personalidad nahulog sa ilang mga kamot.
“Ang ating objective dito is to give justice to those who are oppressed victims. Isa sa mga target natin na ma-accomplish is ‘yong mga wanted person dito sa Davao City and yong mga tinataguan nila,” tin-aw niya.
Dugang ni Driz nga duna silay conference meeting uban sa Davao City Police Office (DCPO) ug sa uban pang mga istasyon sa pulis nga maghiusa og puwersa sa pagsubay sa mga pinangtia nga mga tawo sa siyudad aron nga pugngan sila sa paghimo sa ilang ilegal nga kalihukan.
“Ito ang tinututukan natin and we are upgrading ang list ng mga warrant na ma-update natin and malagay natinsa Top 10 most wanted especially may mga parameters kasi yan kung bakit siya nailagay sa Top 10,” dugang pa niya.
Miapela sab siya ngadto sa publiko nga makig-alayon uban kanila pinaagi sa pagtaho sa mga pinangita nga mga tawo sa ilang komunidad ilabi na kadtong dunay warrant of arrest sa lugos aron nga pakgangon sila sa pagpamiktima pa og uban.
Pipila sa mga kaso sa ilang nadakpan naglakip sa pagpatay, lima ka ihap sa lugos, frustrated murder, attempted murder, homicide, mga kasong sibil, tulis, graft and corruption ug uban pa.
Sa pikas bahin, gibutyag sa CIDG nga upat ang ilang nadakpan sa Oplan Paglalansag Omega, kampanya sa CIDG batok sa private armies ug loose firearms gikan Oktubre hangtud Nobyembre, samtang tulo alang sa Oplan Bolilyo o operasyon batok ilegal nga sugal. (JCR)