KINATIBUK-ANG 16 ka barangay nga gilumluman sa mga rebeldeng New People's Army (NPA) sa mga distrito sa Toril, Marilog, Baguio, Calinan, Paquibato, Buhangin, ug Bunawan gideklarang limpyo, malinawon, ug piskay na nga mga komunidad.
Si Brigadier Genetal Ernesto C Torres Jr., commander sa 1003rd Infantry Brigade nga lakip ang dakbayan sa Davao, nagsulti nga ang Area Clearing Validation Board (ACVB) nga gilangkuban sa mga opisyal gikan sa 1003rd Infantry Brigade, 10th Infantry Division, Davao City Police Office (DCPO), barangay opisyal gikan sa nahisgutang 16 ka barangay ug ang mga opisyal sa lokal nga kagamhanan nagtigum niadtong Miyerkules, Disyembre 12 aron nga i-validate ang rekomendasyon sa Evaluation Board nga paglimpyo sa nahisgutang mga barangay ug mideklara human sa miting sa tanang mga “parameters.”
Kini nga mga barangay mao ang tulo ka barangay sa Toril nga mao ang Atan-Awe, Kilate, ug Tagluno; duha sa Marilog: Baganihan ug Magsaysay; duha sa Baguio, Dacudao ug Gumalang; tulo sa Calinan: Lacson, Dalagdag ug Lampianao; duha sa Paquibato: Sumimao ug Pandaitan; duha sa Buhangin: Tigatto ug Indangan; ug usa ka barangay sa Bunawan: Gatungan.
Matud ni Torres nga ang ACVB mipirma pinaagi sa usa ka resolusyon nga ang 16 ka barangay nga nahisgutan nakatubag sa tanang parameters aron nga malimpyo sa isip “insurgency-affected barangays” apil ang pagbungkag sa Communist Party of the Philippines-New People's Army (CPP-NPA) politico-military structure; ang “denial” sa CPP-NPA nga makasulod sa lugar, rekursos, ug “manpower,” lakip ang suporta sa masa; ug ang pag-establisar og functioning barangay information net ug integrated community public safety system.
“The successful clearing was finally reached as a result of the month-long Community Support Team (CSP) deployment of the military, in close collaboration with the police, barangay officials and the Davao City government, through Peace 911, in addressing the issues that gave rise to insurgency,” butyag ni Torres.
Sa maong katikaran, matud niya nga gilauman nga ang barangay council mahimong nang aktibo sa pagtubag sa panginahanglan sa barangay; suporta sa molupyo ug pagsalmot sa mga programa sa kagamhanan ug kalihukan; ug duna nay aktibong networking ug linkaging sa mga local government units (LGUs), local government agency (LGAs), non-government organization (NGOs) ug mga public officials alang sa epektibong paghatud sa mga batakang panginahanglan ug serbisyo ngadto sa katawhan.
Hangtud sa pagsuwat ning balita, moabot na sa 49 ka barangay sa Davao City ang gideklarang limpyo na sa presensiya sa NPA sukad pagsugod sa tuig.
“The 1003rd Raptor Brigade shall remain an active partner of the Davao City Government in the implementation of peace and development programs to sustain our gains in attaining lasting peace for the city,” pasalig pa sa opisyal.
Samtang niadtong Disyembre 11, gibutyag ni Torres nga laing 18 ka barangay sa Davao City gi-evaluate isip limpyo na. Human sa ebalwasyon, ipailawom kini og “area clearing validation” nga himuon sa ACVB.