Lamberto G. Ceballos
Cawayan, Dalaguete, Cebu
USA ka pulis si SPO2 Tomas Mascardo. Batan-on pa siya sa edad nga trayentay tres. Duna siyay uyab nga ‘call center agent.’ Matahom si Liza Marie nga kaamgid ang panagway sa kang Nadine Lustre, usa ka batan-ong artista. Seksi pod og lawas si Liza Marie nga maoy nakapasamot sa kaibog ni Tomas sa dalaga nga nag-edad og bayenti utso.
“Tumanon gyud nato, Mahal, ang atong gipanumpaan nga dili magluib sa atong gugma!” matod ni Tomas dihang nag-abot sila sa Fuente Osmena Park usa ka hapon. Diha sila manglingkod sa sementadong lingkuranan duol sa ‘fountain’ nga walay tubig.
“Oo, Mahal. Isaad ko nimo nga di tika luiban. Sangko sa langit ang pagmahal ko kanimo. Ug kon ako ang mauna pagbiya ning kalibutana, paabuton ko ikaw sa langit!” ni Liza Marie nga mibaiid sa dughan ni Tomas.
“Buhaton ko sab kana kon ako ang mag-una nimo didto!” ni Tomas nga migakos sa dalaga.
“Basta ha! Basig may lain kang paabuton kon tua ka na didto!” ni Liza Marie nga mihangad sa ulitawo.
“Ha! Ha! Ha! Mitukar na sab ang imong pagka selosa, Mahal!” ni Tomas.
“Timailhan kana sa dako kong gugma nimo!” ni Liza Marie.
Nahilom sila sa makadiyot, dayon giukoban ni Tomas ang mga ngabil ni Liza Marie. Gibati niya ang katam-is sa hinagkan ni Liza Marie.
Taudtaod giagda ni Tomas si Liza Marie nga manulod sila sa Robinsons aron manihapon.
KUYOG si Tomas sa teym sa mga pulis nga dunay rondahong balay nga gituohang’drug den.’ Misukol ang mga durugista nga mga armado ug way palad si Tomas kay naigo siya sa dughan. Dali siya nga gidala sa ospital, apan DOA sumala sa doktor nga mihiling kaniya.
Naamguhan ni Tomas nga naglakaw siya sa usa ka mamingaw nga dapit. Nag-inusara lamang siya kay wa may mga tawo nga iyang nasugatan. Unya nalantawan niya nga may kahayag didto sa unahan. Piskay ang iyang mga tiil nga midala kaniya didto. Misulod siya sa pultahan sa daw palasyo nga edipisyo. Malipayon ang mga tawo nga iyang nakita didto. Nakabatyag siya nga pulos puti ang gipanul-ob nilang mga sapot.
“Unsa kining dapita, Manong?” ni Tomas ngadto sa tigulang nga lalake nga iyang gikasugat.
“Mao kini ang Langit, Undo,” sa tigulang.
‘Langit? Patay na diay ko?’ ni Tomas sa hilom. Gitan-aw niya ang iyang gisul-ob. Dili na kini ang iyang uniporme. Puti na ang iyang sapot nga daw sotana sa usa ka pari. Buot siyang mohilak, apan dili siya makahimo paghilak. Milingkod siya sa usa ka lingkuranang marmol. Duna siyay gihulat.
GIKAN sa gitrabahuan nga ‘call center’ naghuwat og taksi nga kasakyan si Liza Marie. Nakamatikod siya nga may usa ka tawo nga nagpaingon sa iyang nahimutangan, Wa kini niya baliha kay naanad na siya nga ning dapita nga sagad niyang huwatan og taksi may mga tawo, babaye o lalake, nga mag-agian. Apan paghitungod sa tawo sa iyang gibarugan, kalit nga giliunggob niini ang iyang bag diin sa sulod niini diha ang iyang selpon, kuwentas, singsing ug kuwarta. Wala niya buhii ang bag. Nagbinirahay sila. Dihay milabay nga motorsiklo nga ang drayber mihulbaw,”Ihatag na lang na, Day. Bag ra bitaw na!” Apan nakigbisog si Liza Marie. Wa niya buhii ang bag. Unya, may gihulbot ang tawo gikan sa iyang hawak, usa ka rebolber, ug gipusil siya makatulo. Nahagba siya sa yuta ug dihadiha nawad-an sa panimuot.
Naglakaw si Liza Marie nga sama sa naglutaw lang sa hangin. Misulod siya sa pultahan sa dakong edipisyo nga hayag kaayo. Milingi-lingi siya kay may gipangita. Unya nalantawan niya ang usa ka binuhat nga naglingkod sa usa ka lingkuranang marmol. Giduol niya.
“Ganiha ra ka dinhi, Mahal?” ni Liza Marie.
“Dugay na kong gahuwat nimo dinhi, Mahal!” ni Tomas. “Kon wa ka mahiabot ron, maghuwat gihapon ko nimo hangtod sa kahangturan!”
Milingkod si Liza Marie tupad kang Tomas nga miagbay kaniya. (Katapusan)