Dear Papa Joe,
Ako diay si Maribe, 16, taga dinhi lang sa Sugbo. Ang akong problema nga patambagan kay parti sa akong kaugalingon. Feeling nako wala juy magdugay nako nga tawo, tanang mga close friends mawala ra sila nako.
Ang akong best friend man gud nga close kaayo nako gikan pag first year high school kay nausab na ang tanan sukad siya nakauyab. Duna na siyay bag-ong circle of friends nga mao ang mga barkada sa iyang uyab ug ako naetsapwera na.
Second time na ning nahitabo nako. Katong akong best friend pag elementary pod nausab na siya dihang nakabarkada og lain. Nawala na silang tanan maong guol kaayo ko. I know para sa mga tigbasahan aning column nga moingon silang mabaw ra kaayo kog suliran pero para nako bug-at ni kay feeling nako dunay problema sa akong pagkatawo nganong mawala akong mga friends. Tambagi ko sa akong buhaton, Papa Joe.
MARIBE
Dear Maribe,
Yes, bisan ako moingon nga mabaw ra gyud tuod imong problema pero kay para nimo, nabug-atan man ka, ako na lang kang tambagan.
Una sa tanan, bata paman gud kaayo ka. Naa ka pa sa adolescent stage nga dali ra kaayong mangluod, mahiubos ug maglibog sa ilang kaugalingon kay para nimo, something wrong na dayon ug dili na ikaw ang close friend sa imong amiga.
Hinumdomi nga friends come and go kay way permanente niining kalibutana. Bisag unsa pa mo ka suod, kon magminyo na mo unya dunay mga pamilya, mag-iyahay ra gyud mo.
Kon ako pa nimo, focus sa imong pagtuon ug sa imong pamilya. Kanang imong parents ug mga igsuon sila ang imong best friends. Ang tinud-anay nga higala kanang dili ka biyaan ug mounong nimo panahon sa problema. Ug kana mao ang imong mga ginikanan ug pamilya.
PAPA JOE
(Sa inyong mga problema ipadala sa papajoesuperb@gmail.com)