MAPASIGARBUHONG gipahibalo sa Curve Entertainment ug GLP Music ang paglunsad sa bag-ong album ni Lea Salonga nga Bahaghari. Ang tumong niini mao nga mahibaw-an sa ubang nasud ang kamabulokon sa musikang Pilipino.
Ang National Artist for Music mismo, si Maestro Ryan Cayabyab ang prodyuser. Una kining higayon nga ang GLP Music nihimog di Iningles ang sulod ug gusto sa mga tag-iya sa kompaniya nga sila si Angela Jackson ug Rex Niswander nga makat-on ang mga anak sa mga Pinoy sa laing nasud sa mga nindot nga kantang Pinoy.
Mga kantang Tagalog, Ilocano, Kapampangan, Bicolano, Bisaya (Matud Nila, Pobreng Alindahaw) ug Ilonggo ang sulod sa album. Naa na sa Spotify, iTunes, Apple Music, Deezer ug ubang digital platforms ang album.
Ang physical CD nga may pakapin nga lyrics ug ubang kasayuran mapalit sugod sa Lunes, Dis.17.
• • •
Mobisita si Vice Ganda sa Cebu kuyog ni Dingdong Dantes ug Elisse Joson karong Dominggo, Dis. 16. Kini aron pag-promote sa ilang pelikula nga Fantastica nga apil sa Metro Manila Film Festival sugod sa Dis. 25.
Mopasundayag ang tulo sa SM Seaside City Cebu sa alas 4 s.h. Kitakits!
• • •
Just Love sa Pasko 2017 ug Family Is Love sa 2018. Swerte nga nadapit ko sa pag-taping sa 2018 ABS-CBN Christmas Concert adtong Martes didto sa Araneta Coliseum.
Nagkalata ang mga artista didto, mga batan-on ug di na kaayo batan-on. Puno ang venue. Lingaw ang programa.
Klaro kaayo ang paghatag og dakong importansya sa bag-ong Kapamilya nga si Regine Velasquez kay nindot ang iyang pwesto sa programa ug syempre kauban sa iyang mga numero ang mga ngilngig usab nga mga biritero ug biritera sa network.
Wa sab palupig ang mga loveteams nga KathNiel, LizQuen, JaDine, JoshLia ug uban pa. Gihugyawan ug gipakpakan ang mga artista sa FPJ’s Ang Probinsyano pinanguluhan ni Coco Martin nga nikanta sab. May pakatawa portion sila si Jong ‘Alakdan’ Hilario ug si Presidente Edu Manzano Cabrera.
Nakugang ko sa pagkanta ni John Arcilla kay natatak sa akong utok ang iyang mga karakter sa Heneral Luna ug sa Probinsyano. Didto ko nakahinumdom nga artista sa tablado man sab diay ang kyampaw ug, kon wa ko masayop, nakadala kini siya sa papel isip Engineer sa Miss Saigon.
Mga suga sa ngalan sa mga loveteams nga gibitbit sa mga fans nagkatag sa venue. Mabulokon. Ang labing kusog nga pakpak sa mga tawo didto gyud gihatag sa KathNiel, kang Ian Veneracion, Vice ug Coco.
Ipasalida ang konserto sa Kapamilya Network ugma, Dis. 15 sa alas 9:15 s.g. human sa Maalaala Mo Kaya ug sa Dominggo, Dis.16, sa alas 8:30 s.g. human sa Pinoy Big Brother Otso.
• • •
Nagpaabot ko sa pahibalo (ug pagdapit syempre) alang sa pakigkabildo sa mga artista sa Aurora nga gibidahan ni Anne Curtis nga ipasalida sugod sa Dis. 25 kay apil usab kini sa Metro Manila Film Festival karong tuiga. Hangtud sa pagsulat ko niini, wa pa man gyuy kisaw.
Sige lang. Huwaton lang. Mga ingon niining sitwasyon makapahinumdom nako sa kanhi bosing sa Viva Films dinhi sa Sugbo nga si higalang Boy Bosque nga bag-o lang gyud misanong sa tawag sa Labawng Makagagahom.
Pahulay sa kalinaw, higalang Boy. Wa na kay stress sa imong nahimutangan karon.