SECTIONS
Wednesday, January 16, 2019
SUPERBALITA CEBU

Super Suroy: Ang ‘tree sort’ sa Valencia

GUSTO ka bang mo-relax, mopahilayo sa kagahob ug kalangas sa siyudad? Nangita ka og dapit nga bugnaw, puno sa kakahuyan? Kanang palahi ba kay sagad ra ba, sa daplin sa dagat ka lang makakita og mga dapit diin ka pwedeng maka-relax.

Apan sa lungsod sa Valencia, Negros Oriental, dunay usa ka resort nga nagtawag sa ilang lugar og “tree sort” tungod kay gitaliwad-an kini sa kakahuyan sa tiilan sa bukid sa mao nga lungsod.

Naa na sa 22 ka tuig ang Forest Camp, nga mga 30 minutos lang nga mabiyahe gikan sa Dakbayan sa Dumaguete.

Si Adrian Alvarez, operations manager, niingon nga 22 ka tuig na ang ilang establisemento nga nag-operate, apan way bisan usa ka kahoy sa dapit nga ilang gihilabtan.

Matod niya, gipahaum nila ang ilang pagpalambo sa dapit sa unsay porma sa tiilan sa bukid aron way bisan usa ka kahoy ug mga tanom nga maapektuhan.

Duna silay daghang swimming pools nga mahimong masawman bisan sa gagmay nga mga bata.

Ang tinubdan niini duha, ang sapa nga naa lang sa kilid sa resort nagdagaydagay ug ang spring.

Matod ni Alvarez, 90 porsyento sa ilang tubig naggagikan sa usa ka spring ug 10 porsyento gikan sa sapa.

Ang tinubdan sa sapa mao ang Casororo Falls, usa sa mga inilang falls sa Negros Oriental.

Ang ilang swimming pools maorag infinity, kini tungod kay gikan sa agas sa tubod ug sapa, ang tubig niini moambak balik sa sapa.

Sa P120 nga pulta sa dagko ug P100 sa bata, maka enjoy ka na sa ilang lugar.

Duna sab silay paabangan nga mga lawak, nga pang couple ug dunay pang grupo, hangtod sa 20-30 ka mga tawo.

Sa P300, mahimo ka nang maka-enjoy sa ilang mga pagkaon ug ilimnon.

Duna silay hammock house nga dunay managlahi nga rate: Hammock prime - P2,000 nga masudlan og labing minos 20 ka mga tawo; Hammock de luxe - P1500 nga masudlan og labing minos 10 ka mga tawo; Hammock standard -P1,000 nga masudlan og labing minos 10 ka tawo; ug Hammock standard - P600 nga masudlan og labing minos unom ka mga tawo.

Sa mga magtiayon, duna silay cottage nga tag P1,800 (aircon) ug P1,500 (non-aircon). Ang uban niini nag-ambo sa sapa, kansang agos sa tubig ug awit sa mga langgam sa palibot imong madungog.

Duna usab silay zipline nga tag P50 lang, makasuway ka na niini. Sa tag P50 gihapon, makapahimus ka na sa ilang wall climbing, diin mahimo kang makabalik og kaduha.

Gusto kang mosakay og kabayo? Naa sab sila. Bayad lang og P50 matag 15 minutos matag tawo.

Sa hingpit nga relaxation, duna silay spa sa kilid ug nag-umbaw sa sapa. Di ba, relaxing paminawon nga samtang gimasahian ka, madungog mo ang inagos sa tubig?

Kon ikaw taga Cebu City, mahimong mosakay ka og Ceres bus lahos sa Dumaguete City, diin moplete ka og P420. Gikan sa Dumaguete, sakay og habalhabal sa tag P200 lang. Mahimo kining imong i-arrange sa resort.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!