DILI ko maka-ingon nga lami kining karne sa pawikan kay dili man ako mokaon niini. Morag dili madawat sa akong ginhawa ang maong putahi. Dili man ingon nga asyoso ta pero naay mga putahi nga dili gyud ganahan ta makaon kay dili madawat sa akong ginhawa. Kanang pagi, kiyampaw, bakasi ug kanang mga ubod ug casili, dili gyud nato makaon. Huna-huna nako anang ubod ug casili morag halas. Di man sab ko mokaon og halas o sawa. Didto sa amo sa probensiya sa Dipolog City kaniadto, daghang mo-ihaw og sawa ingon man hawo. Pero di nako matulon. Dili man gani ko mokaon og balot bisan sa ngitngit ug bisan maka-inum ko.
Didto sa ubang mga lugar sama sa Pampanga, kanang baki sa basakan, aw, lami kaayo na nga putahi nila. Mokaon kog baki pero kanang giprito o cripsy. Apan sabwan, morag dili madawat sa ginhawa. Ang mga ilaga puwede na pangsud-an sa uban. Pero diri sa ato, bisan unsa ka pobre ang tawo, walay mokaon og ilaga.
Ang pawikan paborito sa uban. Labi pa kon nilarang. Pwerting lami-a kuno ana. Mao nay gitawag nila og ‘power’ diha sa Pasil. Sa Zamboanga City, ang tawag ana nga putahi ‘turtuga’. Gawas nga lami sa uban, aphrodisiac kun pampagana kuno kini sa kama. Aw, nahibawo na ang atong mga kalalakin-an niini.
Base sa Republic Act 9147 ‘gidili ang pag-ihaw o destruction of wildlife species diin nagtangag kini og multa nga pagkabilanggo gikan sa upat ngadto sa unom ka tuig ug multa nga P50,000 ngadto sa P500,000.’ Gi-isip nga usa ka endangered specie ang pawikan kun sea turtle. Kon adunay makadakop niini kon baskog pa, gikinahanglan nga ibalik ngadto sa dagat kay talagsaon na lang kini. Ang pagsikop sa mga nagluto og pawikan diha sa Pasil niadtong miaging adlaw, magsilbi untang leksiyon sa mga nag-ihaw ug nagluto niini.
Pangpagana
Adunay namaligya og tablitas nga gikan sa silik sa iho kay para pangpagana kuno sa pakighilawas.
Tindero: ‘Noy, palit ani kay para patuyhakaw ni junior.
Tiguwang; ‘Unsa man na Dong?
Tindero: ‘gikan sa silik sa iho noy.’
Tiguwang: sus, dong, ayaw na ta ana. Bisan tibuok iho pa akong kan-on, di na gyud mobarug.
(bobbygnalzaro@gmail.com)