Babaye napalgang patay

PATAY nga lawas sa usa ka babaye ang napalgan sa kahuyan nga bahin alas 7:15 sa buntag niadtong Martes, Pebrero 12, sa Rotonda, Barangay Macasandig ning siyudad sa Cagayan de Oro.

Ang patay nga lawas naila nga si Helen Rivera Bolan, gibana-banang 30 ngadto 40 ang pangidaron ug residente sa Pag-asa, Camaman-an ning siyudad.

Sa pakighinabi kang Senior Police Office 2 (SPO2) Joel Tare, imbestigador sa Police Station 9 (PS9) sa Macasandig gibutyag nga sa inisyal nga imbestigasiyon wala kini nakitang mga samad agi og dinunggaban, binunalan o gipanamastamasan ang biktima apan gitambagan niini ang pamilya nga ipa-ilalom sa otopsiya ang patay nga lawas.

"Plastado man ang iyang pagkahigda sa akong pagsusi sa lawas mismo sa biktima wala may akong nakita nga agi og dinunggaban, mga samad ug binunalan, negative gyud," matud ni Tare.

Gibutyag usab sa bana nga gipangita na niini ang asawa niadtong Lunes sa buntag, Pebrero 11 ug gani iya na kining gitaho sa kapulisan human nga wala na makauli niadtong Dominggo sa gabii, Pebrero 10.

Giangkon usab niini nga duna kini gihambing nga sakit ilabi na kini deperensiya sa pangisip kaniadto apan naulian na.

"Mawad-an sa pangisip, matulala kanang mabughat naa po'y panahona maulian siya maayo pud, mawala sa panimoot labi na mapasaran sa pagkaon, mao lage na maglakaw," matud sa bana nga si Anatolio Bolan.

Ang patay nga lawas ang kasamtangang anaa na sa Somo funeral homes alang sa pagpahimutang niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph