ADUNA nay laing alternatibo nga kasakyan ang mga pasahero nga mobiyahe sa Lapu-Lapu City paingon sa mainland Cebu, vice versa, karon nga mi-operate na ang Topline Express Ferry.
Gipahibawo sa CEO/president sa Topline Marina, Eugene Eric Lim, nga rota sa maong ferry manukad sa Mactan Wharf, luyo sa Island Central Mactan (ICM) sa Barangay Ibo, dakbayan sa Lapu-Lapu lahos sa Pier 3, Cebu City ug balik.
Ang double decker ferry vessel adunay seating capacity nga 325 molawig sa matag destinasyon sud lang sa kapin 30 minutos.
Regular nga pletehan mokabat og P25 one-way samtang P22 alang sa mga tinun-an, discounted sab ang mga senior citizen ug persons with Disabilities (PWD) sa tag-P20 ug libre alang sa mga bata nga nag-edad og 3 anyos paubos.
Ang tickets mapalit sa ICM information counter ug sa ticketing booth sa Mactan Wharf ingon man Pier 3, Cebu City area sa dili pa mosud sa gate sa maong pantalan.
Samtang gibutyag ni Brigitte Mueller, Vice President for Operations sa Topline nga aduna silay pahalipay sa mga pasahero niining Disyembre pinaagi sa ilang promo fare nga P15 kutob sa Disyembre 31.
Nasayran nga duha ka ferry vessel sa Topline ang maglawig matag oras nga magsugod sa alas 5 sa kadlawon ngadto na sa alas 8 sa gabii.
Matod pa ni Lim nga makalikay na sa kahuot sa trapiko ang mga pasahero diin nasuta nga minilyon ka mga commuter ang mosulod-gawas sa Mactan island subay sa duha ka tulay.
“Our target commuter ani kay ang mga local commuters, MEPZ worker ug tourist,” tipik sa pamahayag ni Lim.
Butyag ni Mueller nga sa umaabot mohatag sila og special rates sa mga trabahante sa export zone, gawas sa pagtanyag og free shuttle bus service nga kasakyan sa pasahero sa ilang pagdunggo sa Mactan wharf paingon sa ICM.
“Next week ang pick up ug drop off sa shuttle service, maabot sa gate sa MEPZ1,” dason ni Mueller.
Samtang si Mayor Paz Radaza, sa iyang bahin, nahinangop sa maong kalambuan gumikan kay dako kini og ikatampo nga malugakan ang nagkahuot nga trapiko sa dakbayan.