DANAO CITY - NAGKAGULIYANG ang defending champion Cebu City sa athletics event kagahapon apan padayon gihapon silang nanghawod sa overall standing human nangharos ang ilang swimming team sa 2010 Central Visayas Regional Athletic Association nga gi-host sa Danao City.
Sa pagpangulo nila ni Loren Dale Echavez, Anthony Linn Navarro, Danielle Mae Ballesteros ug Jebb Cane, ang Cebu City swimming team nakahakot og 25 golds, 16 silvers ug 13 bronzes sa swimming nga gipahigayon sa Cebu City Sports Center pool.
Kini maoy hinungdan nga nagpabilin gihapon sa ibabaw ang Cebu City nga nakatigom na og kinatibuk-ang 28-31-18 medal haul.
Ang Niños igo lang nakahakot og tulo ka gold medals sa secondary division athletics nga gipahigayon sa Ramon Durano Memorial Sports Complex sa Danao City unya nasiruhan sila Niños sa elementary division.
Nagsunod sa Niños sa standing mao ang Dumaguete City nga adunay 20-19-12 medal tally unya naa sa ikatulo ang Cebu Province nga adunay 11-14-17.
Hinuon ang medal tally dili maoy basihan sa pagdeterminar sa overall champion kay ang torneyo naggamit man karon sa point system.