SUBLING gipamatud-an ni Joavan Fernandez ngadto sa katawhan kun si kinsay matinud-anon ug bakakon kanilang duha sa iyang magsasangyaw nga amahan sa dihang nakaligis ug diriyot na usab kining mamusil sa dalan sa Pooc ug Lawaan 3 niadtong buntag sa Biyernes sa milabayng semana sa iyang nadasmagang managtiayon.
Samtang si Joavan admitido sa iyang pagkahambugero sa estorya’g sa buhat ug walay lipud-lipud sa iyang bisyo sa druga ug pagdala og kargada alang sa pagpanalipod kintahay sa iyang kaugalingon.
Ang balaanong amahan ang magpunay usab sa pagsangyaw sa katawhan nga ang iyang anak usa na ka mahinulsulong makasasala ug ang tanang mga pasangil nga nitumaw, bunga lamang sa pagkapiit sa makaluluoy nga si Joavan sa iyang career sa pulitika nga gustong gub-on sa iyang mga kontra pinaagi sa binayot nga pag-atake kaniya gamit ang mga isyu sa iyang pinalanggang anak.
Apan kon matutunto tingali ni Mayor Soc Fernandez ang pipila sa katawhan sa ubang higayon, dili tingali mahitabong matunto sa gihapon ang tanang Talisaynon sa tanang higayon sa kamatuoran nga ang tinubdan sa pagka-abusado sa anak mao ang pagka-konsentidor ning amahan sa Dakbayan nga angayan untang maglantaw dili lamang sa kahimtang sa iyang gipatuo nga adopted son nga si Joavan, labaw sa interes sa iyang mga konstituwente nga iyang mga anak sa pagpanga-ungdanan.
Dinihugan sa Ginuo sa Uno Distrito si Mayor Soc Fernandez ug suportado usab sa iyang mga supporters nga mga panatiko nga himuon dayong isyu sa simbahan ug pulitika ang tanang lehitimong isyu sa pagpakabuang sa pangalagad sa katawhan.
Hinungdan nga ning panahon sa bugnong lugaynon sila sa gihapon malaumon nga sayon da nilang maangkon ang naandan nga kadaugan.
Apan sa katapusan, walay bakak nga mopatigbabaw sa kamatuuran ug sa adlaw unya sa panudya mangalumpag ang mga abusadong nagtakuban ug angkunon da pagbalik sa katawhan ang tinud-anay nilang katungod isip Haring Lungsod.
POBRE NGA BOTANTE
Daw sa nagsalimuang ang kampo ni Noynoy Aquino tungod sa pagukod na ni Manny Villar sa survey, upat ka buwan sa dili pa ang eleksyon. Kini taliwala pa sa isyu sa C-5 Road controversy.
Maoy nikatap karon ang pasumangil nga si Villar ug Presidente Gloria Arroyo duna nay panagsabot nga anha kang Villar ibubo sa administrasyon ang tanang mehoras ug makinarya sa administrasyon ning taliabot nga eleksiyon.
Apan sama sa gisulti ni Efren Jun Pelaez sa Lapu-lapu City sa Alagad sa DYRF Radto Fuerza, walay mahitabong kausaban kon ang pobreng sektor sa atong katilingban ang dili mahigmata sa kamatuoran nga ang mismong makapalingkawas kanila ug ning atong nasud, naa da mismo sa ilang kaugalingong desisyon. Apan kinsa man usay makamahay sa gutom ug nagkapasmo-pasmong botante kon mokapyot sa bayonita aron makapakaon lang ug lami bisan sa panagsa sa iyang pamilya?
(ikeiidurano@ymail.com)