HEPE sa Mandaue City Police Office niawhag sa mga taga bangko pagpatapot sa hulagway sa giila nga sakop sa "Glue gang" nga si Lunalyn De Pedro diha sa duol sa mga Automated Teller Machine (ATM).
Kini human nga posible karong adlawa, Disyembre 14, makaangkon sa iyang temporaryo nga kagawasan si De Pedro kon hingpit na nga makapyansa.
Gipasabot ni Police Senior Superintendent Julian Entoma nga buot man nila nga matanggong gyud sa prisuhan si De Pedro aron di na makapamiktima pa, apan kinahanglan usab nga sundon nila ang anaa sa balaud, sama nalang nga bailable ang mga kaso nga gipasaka batok kang De Pedro.
Niadtong Martes, gipasaka ang mga kaso nga malicious mischief, walo ka counts sa theft ug sa kalapasan sa Republic Act (RA) 8484.
Subling pahinumdom usab ni Entoma sa publiko nga magbinantayon ug di gyud motuo sa kang bisan kinsa nga kunuhay motabang diha sa pag-operate sa ATM ug mas maayo nga mohimo og transaksyon sa ATM nga adunay gwardiya.
Miasikaso
Usa ka nagpaila nga Atty. Tolentino ang nanalipod kang De Pedro, ug maoy niasikaso aron makapyansa. Matod ni Entoma nga taga dakbayan sa Ilo-Ilo usab ang maong abogado.
“Dili mi motuo nga nag-inusara ni siya, duna ni siya grupo. Gani sa pag-asikaso sa iyang bail, nakakuha dayon siya og abogado. Moingon siya nga wa siyay kwarta, nganong naa man dayon lawyer from her place? Ato ibutang nga paryente o pamilya, mao na gitabangan siya. Pero ato makita nga naa gyud siya daan koneksyon. Ingon siya pobre. Kon uban pa ni, di gyud basta-basta maka-bail,” pagpadayag ni Entoma.
Si De Pedro sa iyang bahin nitug-an sa mga tigbalita, samtang nagtago sud sa C.R. sa prisuhan sa MCPO, nga kon makagawas sa prisuhan, nipasalig nga di na mobalik sa maong pagpangilad ug pamaagi sa pagpangawat. Ug hugot gihapon kini sa panghimakak nga sakop siya sa usa ka sindikato.
“Di na po talaga, Mam, promise mam, uuwi agad ako. Babalik lang ako para sa hearing.... Ewan nga bakit naglabasan yang story na may kasama ako. Ako lang, ako lang talaga, mag-isa, mahirap ng may kasama, idadamay ka, ilalaglag ka lang,” asoy pa ni De Pedro.
Si De Pedro ang nasakpan sa mga personnel sa usa ka bangko, kinsa padung na unta mag-loading og kwarta sa ilang ATM, su’d sa usa ka mall sa dakbayan sa Mandaue, niadtong Lunes sa buntag (Dec. 10), nasakpan nga namutang na og glue sa keypad sa ATM.