POSIBLENG makaapekto sa target collection sa kita sa Kapitolyo sunod tuig ang paglibre na sa mga hospital services sa tanang provincial ug district hospitals.
Subay niini, wala ra hinuon ni-set og dako nga target collection ang Provincial Government sa 2019.
Alang sa tuig 2018, P3.8 billion ang target collection sa Kapitolyo. Wala pa gani mahuman ang tuig, anaa na sa P4.039 billion ang kita sa probinsiya.
Sa tuig 2019, gitug-an ni Assistant Provincial Treasurer Emmanuel Guial nga anaa lang sa P4.069 billion ang ilang target nga kita.
Matod ni Guial, dakong bahin sa koleksiyon sa Kapitolyo ang kita gikan sa mga tambalanan nga moabot sa halos P300 million.
Apan di pa lang dugay, nipalabang og ordinansa ang Provincial Board nga naglibre na sa mga hospital services sa mga tambalanan nga gidumala sa Kapitolyo. Gilantawan nga mo-ubos ug dos hangtud sais porsyento ang koleksiyon sa mga tambalanan tungod niini.
Tungod niini, gitumbok ni Guial nga angayan lang nga dili usab kaayo padak-an sa Kapitolyo ang target collection niini sa 2019 kay wala pa man usab hibaw-i ang epekto sa paglibre sa hospital services sa kinatibuk-ang kita sa kagamhanan.
“Ibutang nato P300 million ang gi-target sa PHO (Provincial Health Office), which is mao sab atong gigamit sa target setting, supposedly sa pag come up with this figure (target collection), makaltasan gyud na siya ug by P300 million. More or less three point something (billion) na lang ang maigo nato next year. Kana ug 100 porsyento gyud (nga libre),” niingon si Guial.
Si Gobernador Hilario Davide III nihangop sa pagkakab-ot na sa 2018 target collection bisan paman ug wala pa nahuman ang tuig.
Matod niya, nagpakita lang kini nga efficient ang collection ug wala nangatulog sa ilang trabaho ang Provincial Treasurer’s Office.
Sigun sa gobernador, ang ilang koleksiyon mao say gamiton pagpadangat sa mga nag-unang serbisyo sa kagamhanan.
Wala hinuon nabalaka ang gobernador sa posibleng pag-menus sa kita sa probinsiya sa 2019 nunot sa paglibre sa hospital services.
“We’re not bothered by that kay gamay ra man ang percentage sa reduction, sa decrease, nakwenta na man na nato. But we do not really mind kay ang importante, ang services nato magpadayon, moabot sa where they are intended to go,” padayag ni Davide. (AZLG)