ALANG sa Kapitolyo, namolitika lang si Kongresista Gwendolyn Garcia sa iyang pagpadala ug suwat kang Bise Gobernador Agnes Magpale ug sa mga board member, diin iya silang gipahimangnuan nga maghinay-hinay sa pag-desisyon labot sa paghatag ug awtoridad kang Gobernador Hilario Davide III pagpatukod sa provincial resource center.
Apan si Garcia miingon nga katungod niya isip Sugbuanon ang pagsukit-sukit sa mga proyekto sa kagamhanan, ilabi na kon kini nakalapas sa mga heritage law.
Ang pagsuwat niya sa mga sakop sa Hunta Probinsiyal gihulagway niya nga opening salvo pa lang sa iyang mga lakang labot sa maong proyekto sa Kapitolyo.
Sa suwat ni Garcia ngadto kang Magpale ug sa mga board member, gipahimangnuan niya sila nga maghinay-hinay sa ilang desisyon paghatag ug awtoridad kang Davide pagpirma sa kontrata alang sa katukuran sa 20 ka andanang provincial resource center.
Matod sa kongresista, usa kini ka “illegal scheme,” diin mahimo silang madamay tanan sa posibleng kaso kon ipadayon gyud ang katukuran niini.
Apan si Magpale walay plano pagtubag sa suwat ni Garcia. Matod niya, pamolitika lang ang gihimo sa opisyal, kinsa kaatbang niya sa gubernatorial race sa 2019 elections.
Susama ang pangagpas ni Davide. Matod niya, nasina lang si Garcia sa mga gipanghimo karon sa Provincial Government ug ang iyang pagtagawtaw batok sa proyekto maoy gigamit nga paagi sa opisyal aron i-abante ang iyang kahigayunan sa politika.
Dugang ni Davide, angayang dili mag apil-apil ang kongresista sa mga kalihukan sa Kapitolyo kay dili man siya opisyal sa Provincial Government.
“Interesado siya kay kumo kandidato siya pagka-gobernador? Mao ba na iyang gibuhat before, iyang binuhatan last time? Ni-derecho man to siya. Wa’y konsulta-konsulta sa Provincial Board. Of course, pamolitika ra na’ng iya,” niingon si Davide.
Si Garcia sa iyang bahin, miingon nga katungod niya isip Sugbuanon ang pag apil-apil ilabi na karon nga iyang gihulagway nga dunay heritage laws nga nalapas sa maong plano sa Kapitolyo.
Matod niya, dili pamolitika ang iyang gihimo ug gihulagway niya nga taphaw ang huna-huna sa mga opisyal sa Kapitolyo nga nagtumbok nga igo lang siya nga namolitika niining iyang pagka-vocal batok sa proyekto.
Dili motug-an si Garcia kon nagplano ba siya pagpasaka ug kaso batok sa mga opisyal sa probinsiya kon ugaling idayon nila ang pagpatukod sa iyang gihulagway nga “Torre ni Davide.”
Apan iyang gipadayag nga “opening salvo” pa lang sa iyang mga plano ang pagsuwat sa Hunta Probinsiyal ug paghatag kanila ug abiso labot sa pagpadayon sa katukuran sa edipisyo.
“Well first of all, every Cebuano has 100 percent business in intervening when heritage laws will be violated. And more so for me, as former governor of Cebu, during whose time, the Capitol was declared a national historical landmark. I feel that it is my duty to point out the construction of a 20-story 'Torre ni Davide' right beside the Capitol would destroy the heritage environment that has been established in the Capitol compound,” padayag ni Garcia.