GIPANIGURADO sa tinugyanan nga mga ahensiya nga luwas ang katawhan ilabi na sa mga klase-klaseng pagkaon sa rehiyon hinungdan nga gipahigayon ang pagpinirmahay sa memorandum of agreement.
Gipahigayon ang pinirmahay niadtong Disyembre 13 sa usa sa mga hotel ning syudad tali sa tinugyanan sa Department of Health (DOH), Department of Science and Technology (DOST) ug lakip na ang (Cagayan De Oro Hotel & Restaurant Association) Cohara aron maoy maghiusa sa tanang mga palisiya alang sa food safety nga gitawag og Food Safety Regulation Coordinating Board.
Sa pakighinabi sa SunStar Superbalita kang DOST-Northern Mindanao information officer Julie Baculio gibutyag niini nga pinaagi sa maong board mamahimong lig-on ang mga kalihokan ilabi na nga maglambigit sa mga pagkaon dinhi sa rehiyon.
“Pamaagi ani mas stronger na atoang kibale movement para ang mga food nga atong kan-on diri sa Region 10 (Northern Mindanao) maka sure gyud ta nga naa na gyud board nga mo-oversee nga para safe ang pagkaon sa katawhan” pahayag ni Baculio.
Gidugang pa niini nga kung dunay mga pangutana kung ang maong pagkaon niagi ba kini sa mga pagsusi ang maong borad na ang motutok niini.
Plano matud niini nga mamahimong susama sa Singapore ang nasud diin luwas ka nga mokaon sa mga street food.
“Ang plano man gud nga mura tag mahimo og Singapore where in Singapore safe kaayo ta mokaon sa mga street foods,” dugang niini.