GIANGKON ni Sangguniang Board Member Wayne Militante atol sa usa ka programa sa radyo nga kung kaniadto pipila ka barangay sa Misamis Oriental ang wala nagbali-bali sa mga programa sa Kapitolyo Probinsyal.
Karong panahona nagkadaghan ang mga kapitan ug mga barangay opisyal ang gusto na sab nga makabaton og proyekto ug programa gikan sa kagamhanan.
Dugang niini nga mag-unsa man ang kataas sa garbo tungod kay mas gipili ang pagpamolitika kaysa mabintahaan ang giserbisyohan nga katawhan.
Daghan sa mga opisyal karon sa kabarangayan sa Misamis Oriental ang nahigmata kon unsa ka dakong importansya ang Barangay Empowerment Program.
Dugang ni Militante nga ning bulan sa Nobiyembre ngadto Disyembre moabot na ngadto sa 21 ka mga barangay ang ilang natunolan sa maong programa nga gitawag kini og Barangay Bambi (Bililhon ang matag baryuhanon ipalambo).
Gipasabot ni Militante nga unod ning maong programa mao ang pagtunol sa matag barangay og proyekto nga moabot sa P300,000 ngadto P600,000 sama sa pagpatukod ug barangay hall o renobasyon niini, covered court, deep well, health center ug uban pa magdepende sa unsay hangyo sa mga kapitan.
“Gusto ni Governor Emano nga kung mahimo tanang barangay mahatagan og proyekto matag tuig aron ang mga kaigsuonan sa Misamis Oriental mobati sila nga tipik ug kabahin sila sa pangoberno sa lalawigan dili ingon nga adunay gipihig ug gipili ug wala gitan-aw ang bulok sa pulitika labina nanimuyo sa kabukiran,” pahayag pa ni Militante. (SVB)