AMINADO si Misamis Oriental Provincial Legal Officer abogado Neil Pacana nga dili madayon ang pagsusi sa fact finding team didto sa Sitio Kamansi sa Banglay, lungsod sa Lagonglong gumikan sa kakulang sa kooperasyon sa mga bakwit.
Matud ni Pacana nga ginhawa na lamang nila nga susihon ang Sitio Kamansi aron pagsuta kong adunay kamatouran ang mga reklamo sa mga bakwit sama sa pagkampo sa mga sundalo lakip ang paguba sa ilang balaanong ampoanan sa dapit.
Gitagaan sila og listahan gikan sa bakwit nga 42 ka tawo mokuyog sa pagsaka sa bukid apan nakurat sila nganong ingon ani kadaghan ug ilang nasuta nga ilang ipauban ang pipila ka mga militanteng grupo.
Butang nga gipasabot niining dili sab nila matugotan tungod kay dayag ilang kasabutan nga ang mga bakwit ug kadtong anaa lamang sa fact finding team ang mosaka.
Gani unang gibutyag ni Pacana nga bisan sakop sa media gidid-an sa pagpasaka og apil.
Gipasabot niini nga bout lamang nila unta nga kamatouran ang masaksihan didto sa dapit ug kung unsay kasabutan nga kinsa’y mosaka dili na molakip ang bisan kinsa.
Una na gihangyo sa bakwit nga unta ipahunong ang martial law aron sila makabalik sa Sitio Kamansi.
Moabot na ngadto sa pito ka bulan nga nagpasilong sa Kapitolyo Probinsyal ang mga bakwit karon panahona.