2 ‘drug pusher’ patay kay nisukol

SAMAD pinusilan sa dughan naangkon sa duha ka mga lalaki nga giingong mga drug suspek human napatay atol sa operasyon nga gikasa sa kapolisan sa Zone 3, Barangay Patrocenio, lungsod sa Claveria, Misamis Oriental.

Ang operasyon gihimo sa Claveria Police Station, Provincial Drug Enfocement Unit (PDEU) ug Provincial Intelligence Branch (PIB).

Target unta sa drug bust operation si Curly Salcedo, taga Baluarte, lungsod sa Tagoloan ug Robert Pagtalunan, lumad nga taga Malitbog, Bukidnon.

Sa report sa kapolisan nga nagpahigayon sila og operasyon tali sa duha dihang atol sa pinalitay sa ginadili nga shabu nakamatikod ang mga suspek nga polis ilang katransaksyon.

Daw unang mibunlot ug pusil ang mga suspek gamit ang kalibre 38 ug kalibre 45 hinungdan mibalos ang kapolisan.

Si Salcedo naigo sa iyang ulo, kilid nga bahin sa dughan ug ubos nga bahin sa pribadong parte samtang si Pagtalunan naigo og tulo ka samad sa dughan.

Gisuwayan pa og dala sa balay tambalanan sa dapit ang mga biktima apan dead on arrival.

Nakuha sa ilang tagsa tagsa ka posisyon ang kalibre nga armas lakip ang ubay-ubay nga pakete sa gitouhang shabu.

Giingong taod taod na nga gimonitor sa kapolisan ang illegal nga kalihokan sa mga suspek mao gikasa ang operasyon apan daw wala gidahom nga mosukol.

Una na nga gimando ni Police Senior Superintendent Rolando Destura ang Provincial Director sa Misamis Oriental Provincial Police Office (Moppo) nga kung magpakita sa pagsukol ug kabayolente ang mga suspek dili magpauna kay giswelduhan sila sa gobyerno aron magpaubos ug insaktong training.

Sa pagsulat ning balita ang patay’ng lawas sa mga biktima anaa na gidala sa Everlasting Funeral Homes sa lungsod sa Tagoloan.

Gibisitahan si Curly sa iyang higala nga nakaila niini ug pipila miingon nga wala sila kamatikod aduna kini ginadili nga kalihokan gumikan nagplano na kining magpalit og balay samtang ang hinigugma niini anaa gawas sa nasod.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph