NAKIT-ANG wala nay kinabuhi ang usa ka asawa sa kanal nga bahin sa West Bound Terminal sa siyudad sa Iligan.
Dakpan ang 57-anyos nga bana nga itago sa ngalan nga Daniel kinsa hugot nga nihimakak nga giunay og patay ang iyang asawa gumikan sa nabiyaan nga nilung-ag.
Sa inisyal nga imbestigasyon sa Iligan City Police Office namatikdan na lamang sa residente sa dapit nga patay na ang asawa nga si Ara nga nagbuy-od sa kanal nga bahin duol sa terminal.
Taod-taod nasab namuyo sa dapit ang magtiayon kuyog iyang pamilya kay namaligya man kini sa dapit.
Gisikop ang bana niini gumikan adunay nakasaksi nga unang nag-inom ang magtiayon ug nagkalalis.
Gani ilang mga silingan misulti nga away-amigo ang relasyon niining magtiayon.
Matud sa kapolisan nga ang anak maoy complainant sa amahan kay kini maoy iyang nakita nga giposposan og bato ang iyang inahan ug nakita nga gihubo sa amahan ang nagkadugo nga pantalon nga gisul-ob niini.
Giingong giawayan sa magtiayon ang nabiyaan nga nilung-ag.
Gihulagway sab kining suspek sa iyang mga silingan nga tapulan ug gani dili kaayo motabang sa panginabuhi diha sa terminal.
Samtang hugot nga gihimakak sa suspek nga siya ang nagpatay sa kaugalingon nga asawa tungod kay lango siya sa makahubog.
Balhog na karon sa bilanggoan ang suspek ug gikatakdang pasakaan og kasong parricide.