SECTIONS
Thursday, January 17, 2019
SUPERBALITA CEBU

Pamilya gikan sa Christmas party patay sa disgrasya

CEBU. Managtiayon, apil ang ilang 9-year-old nga anak nga gikan sa Christmas party patay sa disgrasya. (Contributed photo/Nagiel B. Bañacia)

PATAY ang magtiayon lakip na ang ilang 9 anyos nga anak nga lalake human ma-latayi sa ligid sa tanker ang ilang gisakyan nga Honda Wave nga motorsiklo alas 9:55 gabii, Desyembre 13, sa S. Osmeña Street, North Reclamation Area, Barangay Carreta sa syudad sa Sugbo.

Ang patay diha-diha dayon mao ang asawa nga si Maria Regina Sohitado human mangabali ang kabukogan sa lawas niini, samtang dead on arrival sa Vicente Sotto Memorial Medical Center ang bana nga si Lendie Sohitado.

Ang tulo, matud pa ni Nagiel Bañacia, ang pangulo sa Cebu City Disaster Risk Reduction Management Office, gikan sa Christmas party.

Si Chief Inspector Dindo Alaras, hepe sa Mabolo police station, miingon nga gahapon sa buntag gipahibalo siya sa iyang chief investigator nga namatay na usab ang anak sa magtiayon nga si Redel.

Sa pasiunang imbestigasyon sa traffic section sa Mabolo police station, nagkanayon nga pulos padung sa syudad sa Mandaue ang duha ka sakyanan apan pag-abot sa atubangan bahin sa Cokaliong Shipping, nalatayan sa ligid ang motor.

Giingong nag-karga si Lendie Sohitado og sako lakip na ang mga nadawat niini nga pinaskohan gikan sa gitambongan nga Christmas party sa mga biktima.

Ang driver sa tanker nga gipanag-iya sa Ray of Gold Trading nga si Mariano Rodriguez, 44, nga taga High School Site Fishing Port, Barangay Sangali, syudad sa Zamboanga, mitug-an nga wala siya makabantay nga nakaligis siya'g mga tawo nga nag-sakay og motor.

Matod niya nga niadtong tungora, hinay lang ang iyang dagan nga iyang gi bana-bana nga naa ra sa 20 kilometros matag oras.

“Wala gyud ko kabantay kay traffic man to tapos siya man ang nisuksok sa kilid. Hinay ra akung dagan. Wa ko kabantay nila kay nagbantay ko sa unahan ug naa pa gyuy SUV sa matag kilid nako,” matod ni Mariano Rodriguez.

Dili pa matino matod ni Alaras kung hubog ba ang nag-drive sa motor kay gidali man kini pagdala sa tambalanan apan nakabsan ra usab dayon kini.

Apan bisan pa man niini, mag-atubang gihapon ug kasong reckless imprudence resulting in multiple homicide ang driver sa tanker.

“Sa nakita ra pud nato ba, kining ang motor tulo sila naay bata, nya naa puy dala nga mga regalo, nya naa puy sako ana. Wa pa mi ka sure kung ang pagka-tumba ba niya kanang na outbalance ba sya or kanang nasangit ba,” matod ni Alaras.

Si Bañacia nagkanayon nga sa pag-abot sa ilang medical team sa dapit sa nahitaboan, dako nga kadaot ang nahiagoman sa lawas ang mga biktima.

Gani ang 9 anyos nga batang lalake nabali ang mga bukton niini ug adunay dakong kadaot sa ulo.

Pito ka insidente sa disgrasya sa kadalanan ang natala sa Command Center sa Cebu City Hall diin tulo niini ang nakalas, samtang unom ang nangaangol nga naa karon sa tambalanan.

Mipahimangno si Bañacia nga ning panahon sa holiday season, daghan kaayo ang magmaneho nga naka-inom tungod sa sunod-sunod nga Christmas party.

Matod niya kung dili man makalikay sa pag-inom sa ilimnong maka hubog, labing maayo nga dili nalang mo maneho aron kalikayan ang disgrasya sa kadalanan.

“Ang ato lang sige ra gyud tag warning sa mga tawo kay mao na man gyud ni kaning ting Christmas party...balik ta sa basic. If you drink, don’t drive or don’t drink and drive” matod ni Bañacia.

Gimandoan na usab ni Senior Superintendent Royina Garma ang Traffic Police Group nga panahon sa ilang pag-roving sa kadalanan, badlongon kadtong mga driver nga mabantayan nga nag ikis-ikis na kini sa pagpadagan. AYB


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!