NALIPAY si Guadalupe Brgy. Capt. Eugenio “Jingjing” Faelnar nga naaprubahan ang budget alang sa pagpahigayon sa plebisito sa pagbuwag sa Englis-Banawa gikan sa iyang barangay sa Pebrero 28.
Giluwatan kini ni Faelnar human usab giaprobahan ni Pres. Gloria Macapagal-Arroyo ang gipangayong P1.4 million nga budget ni Kong. Antonio Cuenco. Nangayo si Cuenco niini sa Malacañang human usab ang Commission on Elections (Comelec) niingon nga wa silay budget.
Matod ni Faelnar nga bisan tuod kon supak sila nga mabuwag gyud ang Banawa ug Englis sa Guadalupe, wa kini nagpasabot nga ilang babagan ang plebisito. “Mas maayo nang mapahigayon gyud ang plebisito para mahuman na ni.”
Siya niingon nga dihang iyang nahibaw-an nga way budget ang Comelec alang niini, iyang gipahibawo si Mayor Tomas Osmena sa iyang tinguha nga mopagawas og P250, 000 gikan sa pundo sa barangay aron makatabang sa gikinahanglang budget.