GIKAMADA ang 50 points, 10 rebounds ug 11 assists ni James Harden sa Houston Rockets padung sa ilang kadaugan batok Los Angeles Lakers, nga maoy nagpaluha ni LeBron James, 126-111.
Minghoy si LeBron human sa mga paningkamot niini aron iyang madala ang Lakers sa kadaugan, apan napakyas siya.
Kini ang ikaduha nga triple-double karon nga season ug ika-37 sa iyang career.
Nagpataub sab sila Clint Capela og 16 markers, ug si Danuel House Jr. sa iyang 15 points gikan sa bench.
Misalig sab ang Lakers kang LeBron James nga mikamada og 29 points, apan pakyas lamang sila.
Miubos sa tulo ang layo sa Houston human sa pagbansiwag ni Kyle Kuzma, apan na-foul si Harden sa iyang 3-pointer ug mihimo og tulo ka free throws alang sa mamahimong 112-106 ang iskor.
Pipila ka gutlo nagpaulan og 3-pointers si Harden aron itulak ang ilang abante sa 12.
Gipabida sab ni James ang iyang dunk una mihimo og sunod-sunod nga baskets sila Capela ug Harden aron kompletuhon ang 13-2 run ug himuong 122-108 ang dula.
Samtang kini ang unang higayon nga nagsugat ang duha ka tim gikan sa pagharong sa away nila Chris Paul ug Rajon Rondo niadtong Oktubre, nga nauli sa suspensyon sa duha ug kang Brandon Ingram.
Tungod niini, duna na'y 13-14 win-loss record ang Houston, samtang 17-11 sab ang Lakers.
Karong Dominggo, mobisita ang Charlotte sa Lakers samtang naa sa Memphis ang Rockets.