Ernesto D. Lariosa
San Fernando, Cebu
Lugtaba ang higot sa kalayo
Kon imong kahinam ang dakong sunog
Nga mougdaw sa tanang makasabal
Kasakit kabalaka sa kaasgad sa balatian mo.
Bisan ang way labot nga damgo mapagan
Sa dilaab nga magkadako kon kini
Di matam-ukan sa mabugnawng tubig.
Gipasagdan mo na ang kaigang sa dughan
Nga ning-umol og kainit nga naglumpayat
Ngadto sa siga nga di na mopatalinghog
Sa tingog sa dakong pagpugong.
Kay gusto mo ang kangutngot mopagba
Bisan sa dakong pagpakaaron-ingnon
Sa mahait nga kasingkasing nga nakasamad
Makadaghan kanimo nga di na gani dutlan
Sa kapintas sa tigbas sa imong kalayo!