KADTONG nagsunod-sunod sa liboy sa daro maoy dugokan nga nakapabarog sa nasod. Sila ang mga mag-uuma nga taliwakla sa init ug ulan nagtikad sa yuta. Madasig kon dunay sinsero nga mga opisyal sa gobyerno nga makasabot sa lupad sa ilang kahimtang. Si Ilocos Norte Gov. Imee Marcos mipadayag nga ilhon sa gobyerno ang mga mag-uuma nga maoy bayani sa ekonomiya. Panahon sa katalagman hatagan og financial assistance, trabaho pag-ayo og mga dikes, water catchments, farm roads, publikong inprastraktura samtang magpahiuli sa nabanlas nga pananom ug pamuhi. Nanawagan nga libkason sa gobyerno ang restrictions sa paggamit sa calamity funds aron matabangan gilayon ang nangaigo sa emerhensya. Mosandig sa abag sa DA piunaagi sa Quick Reaction Fund ingon man sa DSWD pag-implementar sa cash-for-work program. Nalatid sa konstitusyon nga katungod sa gobyerno ang pagdasig sa kinabuhi sa mga mag-uuma. Libreng binhi, abuno ug farm implements alang sa dali nga pagbangon human sa kalamidad. Ipasiguro nga ipapalit sa NFA ang ani sa mga mag-uuma aron makatagamtam sa makatarunganong presyo.
Sa mga coconut farmers miproponer si Gov. Marcos og tulo ka rescue package nga nag-antos sa pagkatibugsok sa presyo sa kopras. Una, pautang sa naapektohan nga coco industry. Sa sayo pa mimando si Pres. Rodrigo Duterte sa LBP ug DBP paglusad og programa sa pahulam ug gamiton ang coco levy fund agig suporta. Ikaduha, sumpoon sa gobyerno ang latos sa copra smugglers. Hukasan ug taralon sa hukmanan kay kini economic sabotage ubos sa balaod. Ikatulo, paghingpit sa singko porsento nga coco methyl biodiesel blend nga gimando sa Biofeeds Act gikan sa daang duha ka porsento. Usab gidasig ang mga investors sa paggama og dugang produkto sa lubi sama coconut water, coconut milk, virgin coconut oil ug coconut flour. Ikaduha diay ang Pilipinas nga taas og produksyon sa lubi nagsunod sa Indonesia.
Laing sugyot ni Gov. Marcos nga pakubsan ang buhis sa tobacco farmers sanglit maoy tinubdan sa panginabuhi. Adto ipahamtang ang dakong buhis sa alcohol, ilimnong makahubog, softdrinks ug lana. Mokat-on sa paggamit og renewable energy sama sa windmills, solar ug hydro. Usab nanawagan sa pagsuspenso sa VAT sa nag-unang palaliton nga bugas, isda, karne lakip na ang lana ug elektrisidad tubag sa taas nga inflation o pagsaka sa palaliton.
(csa_1156@yahoo.com/09064648954)