Binghay: Way halog labaw pang dulog

KASAGARANG mga bana o uyab, mag-tuo nga tungod kay ila namang gipakaslan o gika-ipon ilang mga pares, di na sila biyaan ini kay lagi bisag unsa pa ilang buhaton, inig uli naa ra man gihapon ang mga pares andam ug taganang nagpaabot ug atiman.

Apan lahi na karon sa modernong panahon kay wa na mauso ang magpa-martyr nga mohilak na lang sa hilom kon masakitan kay nagka-anam na kataas ang kahibalo sa mga kababayen-an mahitungod sa ilang mga katungod ug baruganan.

Gawas ini, kining mosunod maoy kasagarang mga rason nganong mobiya o mabugto ang relasyon:

Pagka bakakon. Tinuod pila ka tuig gipanday ang pagsalig apan sa usa ra ka pamilok kini maguba pina-agi sa pagpamakak. Kon mawa na ang pagsalig, lisod na kining ibalik labi na og dako-dako ug sakit-sakit ang kalapasan nga nahimo. Way kumo ang pagka matinud-anon.

Pag-usab sa kina-iya o batasan. Kini subidahon kay puro na baya dagko nga nagkita ug nagka-uban unya lain-lain ang kada usa og kagikan ug paagi sa pagpadako. Way asawa o kaipon nga maka magic pag-usab sa kinaiya sa isig ka pares. Ang pagdawat sa tinu-oray nga pagkatawo sa usag-usa maoy tambal ini para maka lahutay sa relasyon.

Way panahon sa usag usa. Karong panahuna nag iya-iya na lang ang matag usa pagpanikay- sikay aron mabuhi unya di kalikayan nga usahay madala ang trabaho sa balay. Bisag panahon sa date, modawat og tawag gikan sa opisina o kaha bisag ting katulog maghisgot gihapon sa trabaho.

Way pahalipay ug pagdayeg. Para sa mga babaye, dako na kaayo na og balor ang paghatag ug pagdayeg ug pasalamat sa mga maayong binuhatan. Ang kahago ug kakapoy mawala kon makadungog sa nindot ug tam-is nga mga pulong ug buhat nga di ikabaylo og gasa o butang.

Way intimasiya. Magti-ayon o uyab lang sa pangalan, papel ug sa atubangan sa uban apan kon sila na lang duha, bugnaw pa sa simod sa iro. Di gali makig- halog labaw pa dulog. Bation sa asawa nga unwanted siya o magduda nga naa nay laing gi huna-huna o gikalingawan ang pares.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph