DUNA man tuoy pipila ang wa makauyon, apan daghan usab ang mipadayag sa suporta kalabot niining pag-implementar sa lungsod sa Minglanilla sa pag-ban sa mga truck nga mag-deliver og mga produkto ngadto sa mga nagkalainlaing establisemento.
Gusto sa mga opisyal sa Minglanilla nga ang pagdeliver og mga goods himuon gikan sa alas 10 sa gabii ngadto sa alas 5 sa buntag, aron dili kini makadugang sa kahuot sa dagan sa trapiko sa maong lungsod ilabi na niining naghinangat nga Pasko.
At least gihatagan og aksiyon ni Mayor Lani Pena kining maong problemaha aron malikayan ang nahitabo sa niaging tuig diin mihugpa ang grabing kahuot sa dagan sa trapiko nga nakapa-kontrobersiya sa maong lungsod.
Pero maayo siguro nga sa dili ipatuman sa maong lungsod ang maong kamanduaan, konsultahon una sa mayor kadtong mga negusyanti nga maoy numero unong maapektohan niini.
Si Myra Lapitan, ang presidente sa Minglanilla Chamber of Commerce and Industry, mitug-an nga duna gyuy operation sa pipila nila ka mga sakop ang ma-paralyze sa higayon nga ipasunod na kini.
Kini maoy angay usab ikonsiderar ni Mayor Pena. Ilhon og unsa kini nga mga kompaniya nga mamahimong mahatagan og exemption sa pagpatuman sa ban.
Tinuod nga ang pagpang-abli og mga dalan o diversion road maoy saktong solusyon sa problema sa traffic, apan por diyos por santo, molanat pa kini og hataas nga panahon una pa hingpit nga mapatuman.
Ang punto mao nga mintras tanto nga wa pa kining maong proyekto, mahimong manikaysikay una og temporaryong solution ang lungsod aron dili makasinati og hataas nga pag-antos ang mga tawo.
Kining maong solusyon anaa ra usab mosandig sa panaghiusa ug pagsinabtanay tali sa gobiyerno ug sa business sector.