MAESTRO gipusil patay kagahapon sa hapon sulod sa iyang classroom atubangan sa iyang mga tinun-an sa lungsod sa Argao, Sugbo.
Puwerteng kurata sa mga tinun-an sa nahitabo sa ilang maestro.
Ang kapulisan blanko pa kon unsay motibo sa pagpatay sa biktima.
Si SPO1 Arnold Abenir nga nahinabi sa Sun.Star Superbalita niila sa namatay nga si Romeo Aguirre Duran, 52, ulitawo, lumad nga taga Negros, apan kasamtangang nagpuyo sa bgry. Binlod sa mao nga lungsod.
Siya nagtudlo sa grade-6 sa Binlod Elementary School.
Matod ni Abenir nga ang biktima naglingkod sulod sa iyang classroom ug nag-record sa grado sa iyang mga tinun-an, pasado alas 3:00 kagahapon sa hapon.
Apan kalit lang adunay nisulod nga waa mailhing lalake ug nangayo pag pangatahuran dayog kuot sa iyang bulsa ug gipusil si Duran. Ang biktima naigo sa walang aping ug wa makalapos ang bala nga maoy nakaingon sa iyang hinanaling kamatayon.
Human sa hitabo, ang wa mailhing tawo yanong nigawas ug nisakay sa motorsiklo nga kolor puwa nga nagpaabot nang daan sa gawas uban sa laing tulo pa ka mga lalake.
“Wala gyuy maka-klaro kay nagkawo og kolor orange. Unya maorag dunay scarf gani, kanang gibutang sa ulo. T-shirt kolor blue unya nag-short pants,” matod ni Abenir.
Mga tinun-an wa usab makabantay sa nawong sa gikatahapan.
Nagkanayon si Abiner nga wa silay nakuhang ebedensiya gikan sa crime scene. Mao nga sila nagtuo nga revolver ang gigamit sa pagpusil.
Sa pagkakaron, ang kapulisan wa pay matumbok nga motibo ilabi na kay ang mga paryenti ug igsuon nga si Manuel Duran ug mga higala sa biktima nibutyag nga wa silay nahibaw-an nga gikaaway sa biktima.
Ang pangulo sa Cebu Provincial Police Office, Sr. Supt. Erson Digal nimando na sa kapulisan sa Argao nga sulbaron ang kremin.
“Wala man ni kontra kuno unya dili pa man sab ni siya dugay nagtudlo diha mga 2007 man siguro,”dugang ni Abenir.