KINAHANGLANG magpabiling hangol sa kampiyunato ang back-to-back champion Golden State Warriors aron dili mahanaw ang ilang tinguhang Three-peat sa National Basketball Association (NBA).
Mao kini ang gipadayag ni Warriors coach Steve Kerr human nasugamak sa dakong kapildihan ang iyang puwersa batok sa Toronto Raptors, 113-93, sa miaging adlaw.
Nagtuo si Kerr nga hinayhinay nang gikaon sa kalampusan ang iyang mga batos hinungdan nga mikompiyansa ug milugak na ang mga duwa niini dili sama kaniadto.
“When you win a championship, part of you forgets how hard it is after the glow of the celebration, the parade and everything else,” pasabot ni Kerr.
“You forget how much work you need to put in. And then you do it again. The same thing happens.”
Ang kapildihan nagpakita sa huyang nga punto sa Warriors hilabi na sa depensa human miretiro ang beteranong si David West.
Sa laing bahin, gikataho nga makaduwa na ang 4-time All-Star nga si DeMarcus Cousins alang sa Warriors sa sunod buwan.
Inig abot ni Cousins, gilaumang matapakan na sa Warriors ang ilang huyang nga departamento.
“DeMarcus is coming along well, he’s practiced a couple times down at Santa Cruz this week,” matod ni Kerr.
Giklaro ni Kerr nga dili siya magdali ug seguraduhon niyang hingpit nang maalim ang angol ni Cousins una kini niya paduwaon. Reuters