MIREHISTRO og triple-double nga gibuwakan og 50 puntos si James Harden aron pangulohan ang kadaugan sa host Houston Rockets batok sa Los Angeles Lakers, 126-111, kagahapon sa National Basketball Association (NBA).
Gawas sa iyang 50 puntos, si Harden nimugna sab og 10 ka rebounds ug 11 ka assists.
Nasurpresa ang Rockets dihang mismong si Harden ang misugyot kang coach Mike D’Antoni nga papahuwayon una siya sa sayong bahin sa 4th quarter, nga wala gibuhat sa kasamtangang MVP sukad masukad.
Niadtong mga gutloa, si Harden nakamugna og 39 puntos apan naglabaw ra og gamay ang Rockets.
Sa pagbalik og sulod ni Harden sa korte sa nahabiling 4:57 minutos, nakadugang pa kini og 11 puntos nga maoy nagpasutoy sa opensa sa Rockets paingon sa 15 puntos nga kadaugan.
“You play 45, 46 minutes, it’s difficult on anybody in this league,” pasabot ni Harden.
“The guys are so talented and great, so that little period that I had to rest, came back in re-energized and ready to make good plays.”
Hasta ang laing pambato sa Rockets nga si Chris Paul, nakugang sa gihimo ni Harden.
“It’s very rare that James or any of us would take ourselves out,” matod ni Paul. “But... I think that gave him that quick little breather that he needed to come in and finish it.”
Sa nahabiling 90 ka mga segundos nalangkat ni Harden ang iyang ika-10 nga rebound nga nagkompleto sa ikaduha pa lang niyang triple-double karon nga season ug ika-37 sa kinatibuk-an.
Ang Rockets, nga ngil-ad nga nakasugod sa season, hinayhinay nang ningsaka sa standings ug naggunit na kini’g 13-14 nga rekord.
Ang Lakers, nga nahagong sa 17-11 nga rekord, gipangulohan ni LeBron James pinaagi sa iyang 29 puntos samtang nidugang og 25 puntos si Kyle Kuzma.
Napungot si James nga ilahang nahatod si Harden s a freethrow line sulod sa 19 ka mga higayon diin usa ra ka freethrow ang nasipyat niini.
“You can’t put him on the line ... he’s already talented,” batbat ni James kabahin kang Harden.
“He can put the ball in the hole multiple ways. He can drive, step-back 3s and you (can’t) give him easy points.”
Ang tulo ka sunodsunod nga freethrows ni Harden maoy nakahatag sa Rockets og 112-106 nga labaw sa naghinapos nga bahin.
Padayong nanginit ang kamot ni Harden hangtod nga nainat niya ang labaw sa Rockets ngadto sa 122-108 sa nahabiling 2:18 minutos.
Wala na nakabangon ang Lakers human niini. AP, ESL