HUMAN gisubhan ang bag-ong substation sa Visayan Electric Company (veco) sa lungsod sa San Fernando niadtong Huwebes,Disyembre 13, laing substations na usab ang gikatakda nga tukoron dinhi sa Sugbo.
Matod sa Chief Operating Officer sa Veco nga si Anton Mari Perdices nga gikinahanglan ang substation hilabi na og nagkalapad ang komunidad ug nagkadaghan ang nanginahanglan og kuryente.
“It’s very important because this is basically what feeds the power lines to the residential, to the commercial, and to the industrial. This is like the hub,” pasabot ni Perdices.
Gisubhan ug giblessingan na ang San Fernando substation nga anaa mahimutang sa Brgy. Panadtaran niadtong Huwebes.
Nagkantidad og P70 milyones ang maong substation diin switching station usab kini aron kon aduna’y mopalyar nga transformer, dali ra mabalik ang supply sa kuryente.
Dugang ni Perdices nga aduna’y kapasidad nga 12.5 megavolt-ampere ang maong substation, sunod kini sa dakbayan sa Naga alang sa habagatan nga mga konsumidor nila.
Gibutyag niya nga tungod sa napanglantawan nga pagdaghan sa building sa Sugbo, magtukod sila sa 2019 og duha ka substation sa dakbayan sa Sugbo.
Lakip niini sa Mambaling area aron mo-supply sa South Road Properties ug ang sa Barangay Lahug.
Hinuon, dili ra mosaka ang bill sa mga konsumidor nga anaa sa dapit nga gitukoran sa substation tungod kay lakip na ang budget niini sa development distribution plan sa usa ka regulatory period nga matag upat ka tuig. HBL