KAPIN na sa 100 ka mga motorsiklo kansang drayber gidakop sa Cebu City Transporation Office (CCTO) ang gi-release kagahapon, Disyembre 14.
Kini ang gipadayag ni Francisco Ouano, operations head sa CCTO, human nimando si Mayor Tomas Osmeña ug nipahamtang og amnestiya para sa mga nakalapas sa Executive Order No. 034 kun counterflowing.
Matod ni Ouano nga di pa ang tanang nadakpan ang nakahibawo sa spot amnesty nga gipahamtang ni Osmeña.
Adunay 559 ka mga motorsiklo sukad niadtong Oktubre nga na impound ug gidahom nga mogamay na tungod sa amnesty.
Daghan ang nangunay og kuha sa ilang na-impound nga mga motorsiklo.
Gidumogan ang impounding office sa CCTO nga nahimutang sa South Road Properties (SRP).
Proseso
Sa di pa ma-release ang motorsiklo, ang tag-iya niini moadto sa opisina sa CCTO para motambong sa usa ka seminar mahitungod sa mga traffic violation.
Human sa maong seminar, adunay exam nga pagahimuon ug kinahanglan makapasar niini.
Si William Naba, 39, diin sa Biyernes sa buntag, Disyembre 14, lang nakahibaw pinaagi sa Facebook sa maong “amnesty”, malipayon sa maong balita.
“Siyempre, gamit pud namo sa work. Thankful pud mi at least natagaan og chance ba nga makuha namo as early as possible,” matod ni Naba, kinsa ang motorsiklo duha na ka adlaw gikan na impound kay nakalapas.
Ang motorista nga si Rey Jhon Olivo, 24, malipayon sa maong balita.
“Lipay kaayo kay dako kaayog kawad-an kon way motor,” pasabot niya.
Ang motor ni Olivo, kinsa kagahapon ra sab sa buntag nakahibawo pinaagi sa radio, nakuha human sa pito na ka adlaw nga na-impound.
Si Gerald Alcorcon Jr., 31, kinsa sa internet nakabasa sa maong ‘amnesty’ ug duha na ka adlaw na-impound ang motorsiklo, daling niadto kagahapon sa impounding area.
“Lipay kaayo mi kay sayop man sad namo. So, nihatag jud si Mayor (Tomas Osmeña nga ma-release jud ang among motor,” pahayag ni Alcorcon.
“Maygani nabasa nako ang ‘amnesty’ ni Mayor mao nang nidiretso mi. Sayo kaayo mi 6:30 sa buntag tua na mi (sa CCTO), process dayon mi,” dugang niya. PAC & Kiziah Marie Suello & Jolissa Mae Taboada, USJ-R Intern