WORST draft ever.
Kini ang paghulagway ni retired Judge Meinrado Paredes sa gipasar sa mga kongresista nga balaudnon nga mag-usab sa sistema sa panggobiyerno ngadto sa federal form, apan wa giapil ang mga provision nga magwagtang sa term limit ug political dynasty sa mga pulitiko.
Pinaagi sa mga boto nga 224 ang niuyon, 22 ang nisupak ug 3 ang ni-abstain, giaprobahan sa ikatulo ug katapusang pagbasa ang Resolution of Both Houses 15 nga nagtinguha nga mausab ang 1987 Constitution ug maghimo og Federal Republic of the Philippines.
Matod ni Paredes, ang pagwagtang sa term limit sa mga pulitiko ug political dynasty, masusama na sa dictatorship nga nahitabo sa ubang mga nasod.
Iyang gihimo nga sanglitanan ang nahitabo sa North Korea ug Cuba nga magkabanay ra ang nagpulipuli og hupot sa renda sa pangagamhanan.
Si Paredes nipasangil nga ang kaugalingon lang ang gihunahuna sa mayoriya sa mga miyembro sa Ubos Balay Balauranan aron magpabilin sa gahom, hinungdan nga wa apila ang probisyon nga magdili sa political dynasty ug magwagtang sa term limit.
“Grabe gyud na ang ilang gihimo, walay mouyon ana except sila ra pud kay natural makapabor man na nila, ang ilaha ana self interes ra gyud. Mao na akong tan-aw anang no term limit ug political dynasty, gamiton ang nakawkaw sa lungsod, kon modaug gamiton nang kwartaha para sa sunod eleksyon, kuha na sad para sa sunod na sad eleksyon,” padayag ni Paredes, kinsa nahimo nga kanhi executive judge sa Cebu City Regional Trial Court, dihang nahinabi sa Superbalita Cebu sa Biyernes, Disyembre 14. SCG