NAGPAHIGAYON karon og pre-feasibility study ang usa ka pribadong kompaniya nga nagbase sa Austria alang sa posibleng pagpatuman sa Aerial Ropeway Transit (ART) sa Sugbo.
Si Engr. Fortunato “Jun” Sanchez, Jr., kanhi chairman sa sub-committee on infrastructure and utilities sa Metro Cebu Development and Coordinating Board (MCDCB), niingon nga usa kini sa “basket of solutions” nga iyang gipresentar ug giaprobahan sa MCDCB sa pagsulbad sa suliran sa trapiko sa Sugbo.
Sigon niya, ang ART mo-complement sa Bus Rapid Transit (BRT) ug Light Rail Transit (LRT).
“Dili tanang dalan ang grabe og traffic. Daghan man og areas sa Cebu City nga grabe ang traffic pero di taas ang capacity so atong i-mix. Katong dili kaayo grabe og traffic atong butangan og ART, katong grabe ang traffic butangan nato og LRT (BRT), so, mo-compliment ra siya,” pahayag ni Sanchez.
Sa ikaupat nga full council nga tigom sa Regional Development Council (RDC) 7 sa Biyernes, Disyembre 14 sa One Central Hotel, matod ni Sanchez, presidente sa Socor Construction Corportation, ang ART halos susama og passenger capacity sa BRT ug LRT.
Matag cabin, kaya mokarga og 10 ka mga pasahero o sa kinatibuk-ang 4,000 ka mga pasahero matag oras sa matag direksyon o equivalent sa 200 ka mga jeep pasaheroan sa matag oras ang kaya nga makarga niini. SCG