KANHI kandidata sa Ms. Cebu 2018 nasikop sa buy bust operation sa mga sakop sa Guadalupe Police Station pasado alas 2 sa kaadlawon sa Sabado, Disyembre 15, sa Escario street, Barangay Kamputhaw, siyudad sa Sugbo.
Ang nasikop giila nga si Teri Marina Silva Colmenares, alyas Teri, 22, taga Gen. Echaves street, Barangay Zapatera, Dakbayan sa Sugbo.
Siya tinun-an sa usa ka dakong unibersidad sa syudad sa Sugbo sa kursong Business Administration kon basehan ang nakuhang identification ( ID) card sulod sa iyang sakyanan.
Nakuha gikan kaniya ang pito ka pakete nga adunay sulod nga high grade marijuana nga gitawag sa gawas sa nasud nga kush weed ug laing duha pa ka pakete nga maoy gipalit sa mga pulis.
Lakip sa nakuha sa kapulisan ang P2,600 nga gituohang halin sa dinakpan, cellular phone niini ug ang sakyanan niya nga Honda nga adunay plate number LJI88.
Matod ni Sr. Inspector Dexter Basirgo, hepe sa Guadalupe police station sa Cebu City Police Office (CCPO) nga niadtong Disyembre 8, aduna silay nadakpan nga usa ka disc jockey sa usa ka diskohan.
Ang DJ gireklamo sa pagpanglugos sa usa ka babaye nga giingong na high sa LSD kun Lysergic Acid Diethylamide, nga naila usab nga acid kun party drugs.
Gipaubos nila sa imbestigasyon ang DJ kon asa siya magpalitan sa party drugs ug nihatag kinig impormasyon kon kinsa ang iyang suki.
Alas 12:15 gahapon sa kaadlawon pinaagi sa text, ilang gi entrap si Nicole Allan Casiño, 24, taga Barangay Apas, apan giingong lumad nga taga Cagayan de Oro City. Si Casiño nakuhaan og pito usab ka LSD lakip na mga marijuana.
Gitug-an ni Casiño kinsa ang tig supply niya sa LSD nga matod pa gikan ra usab sa Cagayan diin ipadala pinaagi sa courier ug ang bayad ipadala sa money courier.
Samtang ang mga marijuana gikan sa usa ka maanyag nga babaye nga kandidata sa Bb. Cebu niadtong Septiyembre ning tuiga.
Human makuha ang tanang detalye pagka alas 2 sa kaadlawon, ilang giteksan ang numero ni Colmenares nga mopalit silag marijuana nga balor P3,000.
Didto sila mag abot sa usa ka establisemento sa dan Escario.
Sa dihang natunol na ang duha ka pakete sa marijuana nagpaila dayon ang mga pulis nga buy bust operation ang ilang gihimo.
Nisuway pa unta pagsibat si Colmenares pinaagi sa pagpadagan sa iyang puti nga sakyanan, apan dali ning napugngan sa pulis nga iyang gikasabot.
“Among gisuwayan og transact si Teri thru text, ni kubit man siya then she is willing to deliver. So, amo siyang gi meet kon asang lugara ug tuod man napalitan nato siyag balig P3,000,” asoy ni Basirgo.
Gipaubos dayon sa imbestigasyon si Colmenares apan igo lang matod pa kini nitug-an nga adunay tawo nga mobilin sa maong butang ug wala siya makaila niini.
Gihulagway ni Basirgo ang marijuana nga nakuha gikan kang Colmenares nga imported sanglit ang maong klase sa drugas wa gipatubo sa Pilipinas sigun sa kompermasyon sa Philippine Drug Enforcement Agency 7 (PDEA) 7.