NIPAABOT sa iyang dakong suporta si Misamis Oriental Governor Yevgeny Vincente Emano sa bag-o lang gihatagan ug dugang lugway nga usa ka tuig ang gipatumang martial law sa pulo sa Mindanao.
Matud sa gobernador nga posibleng nalantaw sa kamara nga adunay gikaayo ang martial law dinhi sa pulo sa Mindanao ug tungod nahukman naman kini wala siya’y lain mahimo kon dili ang suportahan ang kasundalohan ug kapolisan sa ilang gihimo.
Gani sa pagpatuman niini iyang namatikdan wala ma’y mga katungod nga nayatakan.
“Sa pagpatuman sa martial law, wala pa man sab kita’y nakita nga pagpangabuso dinhi sa atong lalawigan,” matud ni Emano.
Apan giklaro lamang ni Emano nga lakip siya mismo molantaw kon misubay ba sa gabayan sa martial law ang mga tigpatuman niini tungod siya mismo dinhi sa probinsya dili motugot nga adunay mga katungod nga mayatakan nga iya gyod ikasuko dinhi sa lalawigan.
Pinal nga nahukman sa mga magbabalaod niadtong Miyerkules ang laing lugway o ekstensyon sa martial law ngadto sa usa ka tuig hangtod sa Disyembre 2019.